Conceyu Asturianu de Solidaridá con Chechenia

Muslim Ibragimov, pa Caucasian Knot

Los neños minusválidos d’esta república nun tienen oportunidá de recibir un tratamiento afayaízu, yá qu’esiste un sólu centru de rehabilitación pa los alredor de 40.000 neños que tán nesa situación.

Sigún el Ministeriu de Trabayu, Inserción Llaboral y Asuntos Sociales de Chechenia, anguañu la república tién 41.189 neños minusválidos. Amás 1.300 güérfanos de padre y madre y 25.000 d’un de los dos viven nel país.

Sigún el voceru del Ministeriu, la inmensa mayoría de los neños minusválidos son víctimes de la guerra. Por embargu, la república tá faciendo frente tovía al retu d’apurrir la necesaria ayuda mélica y sicolóxica a los neños minusválidos.

“Anguañu, namás el 1,6% de tolos pacientes infantiles reciben l’ayuda necesaria pa la su rehabilitación”, afirmó esta mesma fonte al corresponsal de Caucasian Knot.

Sigún esta fonte, en cumplimientu d’un acta llegal especial, aprebada en Rusia en 1994, tién qu’haber un centru especializáu de rehabilitación por cada mil neños minusválidos. Chechenia tién namás un sólu centru d’estes característiques, allugáu na ciudá d’Argún y con capacidá pa non más de 300-350 pacientes per añu.

Sigún añade l’espertu, “nun futuru cercanu Grozni va entamar la construcción d’un edificiu pa un Centru de Rehabilitación dotáu con 220 cames. Por embargu, nun va ser suficiente pa resolver el problema de suministrar a los neños enfermos una ayuda sicolóxica y mélica de calidá”.

Esbilla | del.icio.us

Dexar un comentariu