Conceyu Asturianu de Solidaridá con Chechenia

www.waynakh.com

La 43ª sesión del Comité de les Naciones Xuníes (NX) contra la tortura tuvo llugar en Xinebra ente los díes 2 y 20 d’esti mes de Payares. Como resultáu de la sesión, el Comité de les Naciones Xuníes contra la tortura confirma que la deportación de refuxaos chechenos puede suponé-yos a éstos un riesgu real de sufrir tortures.

Nesta 43ª sesión del Comité de les Naciones Xuníes contra la tortura, ésti debatió’l tercer informe periódicu de la República d’Azerbayán sobre la Convención contra la tortura y otros castigos o tratamientos crueles, inhumanos o degradantes. La representación d’Azerbaiyán formáronla 13 funcionarios del Estáu, y taba encabezada por Khalaf Khalafov, Viceministru d’Esteriores.

Durante la sesión, el Centru de Drechos Humanos d’Azerbayán, xunto cola Federación Internacional de Drechos, Humanos presentó’l su informe sobre la situación n’Azerbayán. Dalgunes partes del informes taben rellacionaes colos solicitantes d’asilu y refuxaos chechenos n’Azerbayán:

“Violando la llei y la obligación del Estáu a non “espulsar, retornar (devolver) o estraditar a una persona a otru Estáu nel qu’haiga razones fundaes pa creer que la persona podría tar en pelligru de ser oxetu de tortura” siguiendo l’artículu 3 del Comité contra la tortura, diéronse casos n’Azerbayán d’estradiciones a otros países con informes negativos sobre drechos humanos, como por exemplu la estradición de chechenos a Rusia o la de kurdos a Turquía. Nestos casos, Azerbaiyán antepón los alcuerdos billaterales a los trataos europeos.

Los dellos miles de solicitantes d’asilu chechenos sufren permanentes problemes col reconocimiento del su status. El Comité estatal d’Azerbayán pal trabayu con refuxaos y desplazaos internos tovía refuga trabayar con esti grupu de solicitantes d’asilu y redirixe l’asuntu a la oficina en Bakú del Altu Comisionáu de les Naciones Xuníes pa los Refuxaos(ACNXR).

A los chechenos, polo xeneral, se-yos apurre una carta estándar confirmando que l’ACNXR tá estudiando los sus casos, fechu que-yos ayuda pa evitar la espulsión forciada del país. Pero incluso dempués de 3 o 4 años, o en dalgunos casos más tovía, d’esti “estudiu”, tovía nun disponen del status oficial de refuxaos. Incluso la viuda del primer presidente chechenu, Djohar Dudayev, y la familia d’Aslan Maskhadov nun consiguieron ésti status y fueron obligaos a abandonar el país.

Anque les autoridaes d’Azerbayán nun practiquen la devolución formal de chechenos, toleren la desapaición y estraditen chechenos a Rusia. Dende 1999, al menos 24 chechenos fueron tresferíos illegalmente a Rusia, onde sufrieron tortura. El casu más famosu foi’l de Ruslan Eliyevich Eliyev, que foi rexistráu como refuxáu pola ACNXR col nb. 6032. Dempués del su secuestru en Bakú’l 9 de Payares de 2006, foi atopáu muertu en Samashki, Chechenia, en Marzu de 2007, nuna bolsa tirada dende un helicóteru, y con marques de tortures graves. N’Abril de 2008, Yusup Nagayev foi arrestáu pa ser estraditáu a Rusia. Taba tamién rexistráu como refuxáu pola ACNXR, col nb. 4338. El 7 de Febreru de 2009 foi estraditáu a Rusia. En Xunu de 2008, Azerbayán estraditó a la fuercia a un solicitante d’asilu minusválidu, Suleyman Ayubov, rexistráu pola oficina de l’ACNXR en Bakú col nb. 6024.

Amás d’ellos, al menos otros 18 chechenos fueron estraditaos secretamente dende Azerbayán y posteriormente executaos arbitrariamente en Rusia. En concreto, el representante de los rebeldes chechenos informaba en Mayu de 2008 informaba de los nomes d’éstos: Kyuri Azimov, Rasul Aziyev, Hampash Bogayev, Aset Zhavazhbaudinovna Chuchayeva, Zelimkhan Hamzatovich Demlekhanov, Mussa Vakhaevich Dikayev, Ruslan Muslimovich Edilov, Aslan Mogomed-Eminovich Eskiyev, Bislan Gadayev, Imran Gaziyev, Dokka Lechiyevich Marayev, Ramazan Mazhidov, Abubakar Mezhidov, Ruslan Oybuyev, Shamil Shamsudinovich Shaipov, Zara Tsulayeva y Salam Yandarbiyev.

Poro, dalgunos chechenos intenten usar la porhibición temporal de non devolución como midía provisional énte’l Tribunal Europeu de Drechos Humanos (TEDH). Por exemplu, el solicitante d’asilu chechenu Hadji Chankayev foi estraditáu a Rusia por una solicitú d’ésti país rellacionada con un actu terrorista en Kaspiysk, Rusia, pesie a la petición del su abogáu de la midía provisional. El TEDH nun foi informáu pol Gobiernu sobre l’alegación d’ausencia de petición d’estradición de Rusia. Unos pocos díes después, énte la rempuesta negativa del TEDH, Chakayev oi estraditáu. Poro, les fuercies de seguridá ruses nun atoparon a Chakayev culpable d’actos terroristes y cambiaron l’acusación pa poder consiguir la estradición. Finalmente, les autoridaes ruses lu acusaron y sentenciaron por unos supuestos fechos cometíos una década enantes pa xustificar la petición d’estradición. N’otru casu, el 30 de Xunu de 2008, les autoridaes azerines arrestaron a Alikhan Khasuyev, que tenía’l nb. 780-06c06036. Sólo una petición urxente de midíes provisionales del TEDH nel trescursu del casu Khatuyeva y Khasuyev contra Azerbayán y Rusia (nb. 33810/08) evitó la su inmediata estradición.

La República d’Azerbayán arrestó y estraditó a los sus países d’orixe a docenes d’estranxeros acusaos de crímenes cometíos fuera d’Azerbayán. Dalgunos d’esos casos pueden considerase débiles pol artículu 4 del Comité contra la Tortura. Por embargu, la esistencia de práctiques de tortura nestos países y la falta de procedimientos efectivos d’apelación rellaciona estes cuestiones col artículu 3 del Comité contra la Tortura. Por exemplu, nel casu yá mencionáu de Yusup Nagayev, ciudadanu rusu d’orixe chechenu, les autoridaes ruses solicitaron la su estradición alegando los artículos 111 (intención d’inflinxir un dañu grave) y 126.2 (secuestru) del Códigu Penal de la Federación Rusa. Nagayev foi arrestáu, pesie a que nel momentu de la su detención taba rexistráu na oficinal llocal de l’ACNXR col nb. 4338. El 9 de Mayu de 2008, el TEDH paralizó la estradición y comunicó a les partes la información al respectu. El 13 d’Avientu, l’ACNXR decidió nun-y conceder el status de refuxáu a Nagayev. Asina, el 22 d’Avientu de 2008, la Fiscalía decidió estraditalu a Rusia. El 23 de Xineru de 2009 el Tribunal de distritu confirmó esta decisión, y el 7 de Febreru foi estraditáu, supuestamente ensin oportunidá d’apelar contra esta decisión.

Hai que reseñar que nel xuiciu del casu Shamayev y otros contra Xeorxa y Rusia (nb. 36378/02, 12 d’Abril de 2005), el TEDH resolvió que la intención de Xeorxa d’estraditar a cinco chechenos a Rusia violaba l’artículu 13 xunto colos artículos 2 y 3 de la Convención Europea de Drechos Humanos. Esto sinifica qu’enantes del cambiu de posición del TEDH, los tribunales de la República d’Azerbayán teníen que tener en cuenta esti precedente y nun estraditar a los chechenos a Rusia y xulgalos n’Azerbayán si fuere necesario”.

Nel caberu día de la sesión, el Comité de les Naciones Xuníes contra la Tortura persentó les sus observaciones concluyentes con un informe. Nel informé, el Comité punxo enfotu nel “principiu de non devolución”:

“El Comité tá esmolecíu polos casos de devolución estraordinaria, tales como la devolución de chechenos a la Federación Rusa, basaos n’alcuerdos billaterales d’estradición, y de kurdos a Turquía, onde tienen un riesgu real de sufrir tortures. El Comité llamenta la falta de datos suministraos sobre les peticiones d’asilu y refuxaos, númberu d’espulsiones, casos de devolución y estradición, asina como del númberu de casos sometíos a una revisión alministrativa xudicial. El Comité tamién llamenta l’ausencia d’información sobre garantíes diplomátiques y de procedimientos de monitoréu post-retornu afitaos pa casos como éstos (art.3)”.

Esbilla | del.icio.us

Dexar un comentariu