Conceyu Asturianu de Solidaridá con Chechenia

Valeri Dzutsev

El pasáu 3 de Payares, el presidente de Daguestán, Mukhu Alíev, convocó un conceyu especial pa tratar los problemes de los ciudadanos d’etnia rusa residentes na República. Pesie al tonu optimista qu’exhibíen los funcionarios, paez ser que los rusos siguen colando de Daguestán, anque les cifres nun son tan elevaes como lo fueron xusto dempués del colapsu de la Xunión Soviética en 1991.

Sigún el presidente Alíev, en 1959 los rusos representaben el 20% de la población daguestaní y yéren el segundu grupu étnicu más importante d’esta multiétnica república. Por embargu, en 1989, la población d’etnia rusa quedó amenorgada al 9% de la población total de la República, y los años que siguieron, a menos del 5%. Güei, los ciudadanos d’etnia rusa ocupen la sesta posición nel rangu de les numberoses etnies esistentes al Daguestán: ávaros, darguinos, kumikos, lesguinos o laks superen en númberu a los rusos. Nel periodu comprendíu ente los dos censos rusos (1989 y 2002), la población rusa en Daguestan perdió un 27%. Viven nel Daguestán menos de 120.000 persones ruses, sigún les cifres oficiales.

Daguestán ye la mayor de les siete repúbliques que formen el Cáucasu Norte, y el 1 de Xineru de 2009 tinía una población estimada de 2,7 millones de persones. Tamién rexistra’l crecimientu más altu en númberos absolutos: nel 2008, la su población incrementóse en más de 30.000 persones. La población de la Federación Rusa, en cambiu, disminuyó en más de 300.000 persones aquel mesmu añu. La población xeneral de les repúbliques del Cáucasu Norte acércase a los 7 millones mientres la población d’etnia rusa sigue disminuyendo.

Esta tendencia a la baxa na población d’etnia rusa puede comprobase tamién n’otres repúbliques del Cáucasu Norte. El casu más notable ye Chechenia, onde les dos sangrines guerres y el periodu que les siguió de desórdenes y guerra de baxa intensidá prevocaron un amenorgamientu radical de la población rusa. Calcúlase que Chechenia perdió unes 250.000 persones d’etnia rusa ente 1989 y 2002. Sigún cifres oficiales, la población rusa en toles repúbliques del Cáucasu Norte disminuyó en 364.000 persones nesti mesmu periodu. Por embargu, los datos reales apunten a cifras superiores: los espertos opinen que’l declive en población rusa llegó a les 415.000-420.000 persones, esto ye, el 31% del total de rusos que vivíen nes repúbliques del Cáucasu Norte. En númberos absolutos, les cifres indiquen que se pasó de 1,36 millones de rusos en 1989 hasta 940.000-945.000 nel 2002.

Les diverxencies ente las cifres oficiales y les estimaciones de los espertos desplíquense porque, nel censu de 2002, consideráronse dalgunos grupos eslavos (bielorrusos) como integrantes de la etnia rusa, y tamién se contabilizaron les tropes ruses desplegaes como si fueren parte de la población llocal estable. De 1989 a 2002, el porcentaxe de población d’etnia rusa nel gruesu la población de les repúbliques del Cáucasu Norte pasó de representar un 26% a un 12-15%, mientres les poblaciones indíxenes esperimentaron un incrementu del 66% hasta superar el 80%, esto ye, en númberos absolutos, de 3,5 hasta 5,3 millones de persones www.valerytishkov.ru).

L’amenorgamientu de la población d’etnia rusa nes repúbliques del Cáucasu Norte tá siendo una cuestión persensible pal Kremlin, y pal públicu rusu en xeneral, yá que la retirada de los ciudadanos d’etnia rusa de la rexón interprétase como una perda del control sobre esta zona. Por eso’l serviciu estatal d’estadístiques vién intentando meyorar la imaxe restando importancia a esti fechu.
La guerra y la falta de seguridá de les personas señálense como les principales razones d’esti fluxu de rusos fuera del Cáucasu Norte.

De fechu, Chechenia ya Inguxetia son los dos sitios onde más disminuyó la población rusa, y, anguñu, prácticamente nun hai rusos que residan allí, si esceptuamos a los militares rusos. La economía de la rexón, baxo mínimos, ye otru factor importante qu’impulsó la marcha de los ciudadanos de etnia rusa. De fechu, nun sólo los ciudadanos d’etnia rusa marcharon del Cáucasu buscando meyores oportunidaes económiques, tamién lo ficieron otros pueblos orixinarios del Cáucasu Norte.

Una de les principales causes del amenorgamientu de la población rusa del Cáucasu Norte pasa desapercibía davezu. Mientres crez la conciencia d’identidá de los pueblos indíxenes y’l su nivel educativu prácticamente igualóse al del restu de Rusia, nun quedó dengún espaciu social pa los ciudadanos d’etnia rusa. Eso sinifica, de fechu, que pesie a los progresos que pueda haber nun futuru prósimu, tanto si meyora como si non la seguridá y la situación económica nel Cáucasu Norte, difícilmente sedrá posible revertir la tendencia.

La única mena de camudar esta inclinación a marchar sedría pacificar realmente la rexón y facer importantes inversiones col finxu d’incentivar a los ciudadanos d’etnia rusa a volver a instalase na zona. Pero incluso si Moscú consiguiere apaciguar el Cáucasu, habría dar rempuesta a tantes otres prioridaes económiques que, difícilmente, el Cáucasu entraría na llista.

Esbilla | del.icio.us

Dexar un comentariu