Conceyu Asturianu de Solidaridá con Chechenia

Grozni trae a la mente destrucción y masacres pero anguañu ye quiciabis una de les ciudaes más guapes de la Federación Rusa, con munches obres en marcha y soleaes aveníes con bellos edificios. Los pocos que s’animen a falar con un periodista estranxeru refuercen esta imaxen oficial. Nin la más mínima crítica, hasta que ún allónxase de la cai y s’alcuentra cola Chechenia real.

Urtzi URRUTIKOETXEA, GARA

Nun ye fácil intentar perpasar el llímite d’una población aterrorizada que nun gana nada y tién muncho que perder falando con periodistes estranxeros. Na sede de Memorial preséntase un home al que l’enfadu impidi-y callar. Son los propios miembros d’esta organización de drechos humanos los que-y alvierten de les consecuencies y dirixen la conversación pola senda’l anonimatu. Diremos que l’home, d’unos cincuenta años, llegó del pueblu de Shali, onde acaba tener llugar una zachistka (operación especial). L’home nun se quexa de que los kadirovtsi, los homes armaos del presidente, entregáran-yos el cuerpu torturáu del su sobrín, supuestamente miembru de la guerrilla. Asume la retórica del gobiernu, repetía durante estos díes por Ramzan Kadirov: «Nun vamos garrar prisioneros, vamos destruilos. Mientres esistan, habrá sangre». La quexa de Zurab (nome ficticiu) ye que dempués d’entregar el calabre del supuestu militante los kadirovtsi dieron-y una paliza al su pá: «¿Qué culpa tinía’l mio hermanu?».

Nesta misma sede de Memorial trabayaba Natalia Estemirova compilando los datos de desapaiciones, ufriendo ayuda llegal a les víctimes y denunciando la impunidá del gobiernu de Ramzan Kadirov. Díes más tarde de la nuesa visita, el pasáu miércoles 15 de Xunetu, foi secuestrada a plena lluz del día xunto a la su residencia en Grozni p’apaecer muerta a les poques hores na vecina Ingushetia, con tiros na tiesta y nel pechu. Oleg Orlov, director de Memorial en Moscú, tiénlo claro: «Sé, toi seguru de quién ye’l culpable del asesinatu, el su nome ye Ramzan Kadirov. Yá la hubiera menaciao, insultao, la considerábala la su enemiga personal. Nun sabemos si él mesmu dio la orden o ficiéronlo los sus collaboradores pa complacer al xefe».
El comunicáu oficial de Memorial añade lo que vién darréu: «Agora queremos llamar a les coses pol su nome: en Rusia reina’l terror d’Estáu. Sabemos qu’hai asesinatos dientro y fuera de Chechenia. Maten a los qu’intenten dicir la verdá, a los que critiquen a les autoridaes. Ramzan Kadirov fae imposible el trabayu de los activistes en Chechenia. Los que mataron a Natasha queríen cerrar esti fluxu d’información verídica que salía de Chechenia».

Denuncies constantes

El presidente niégalo, naturalmente, y promete investigar, «de manera oficial y estraoficial, siguiendo les nueses tradiciones». La mesma escusa, la tradición, sirve pa un rotu que pa un descosíu: pa saltase toles lleis de Chechenia, de Rusia ya internacionales y secuestrar, torturar y executar sumariamente a persones acusaes de ser guerrilleres, como pa castigar colectivamente a les sus families incendiando les sus cases. Precisamente Memorial y Human Rights Watch acaben de denunciar la vuelta de tuerca que Kadirov tá dando a la contrainsurxencia, atacando a los familiares de los boieviki (lluchadores), nun yá como táctica de guerra sucia estraoficial sino xactándose d’ella: son continuos los anuncios na televisión oficial menaciando a tola población de les terribles consecuencies de «nun controlar a los fíos».

Natalia Estemirova foi una de les perpoques voces que denunció la impunidá del réximen de Kadirov. Énte la insultante imaxen de normalidá qu’intenta vender al mundiu, la valiente activista (compañera íntima d’Anna Politkvoskaya, periodista rusa muerta a tiros en 2006 a la que acompañó en bien de viaxes pela república) nun dexó d’asoleyar y denunciar la realidá de Chechenia. Y fízolo hasta’l día la su muerte: la víspera intentó aconceyar, xunto a la responsable del Comité d’Asistencia Civil Svetlana Gannushkina, con Masjud Abdullayev, deportáu recientemente dende Exiptu. El su pá, Supian Abdullayev, ye’l segundu, tres de Doka Umarov, na guerrilla islamista que reivindica l’Emiratu del Cáucasu. Esi mesmu llunes, Estemirova denunció cómo los homes de Kadirov entregaron el cuerpu d’una moza a la su familia cola orden de que la enterraren «ensin facer ruíu». Estemirova informó a la publicación «Kavkazkii Uzel» de que «a primeros de Xunu Madina Yunusova, ñacía en 1989, nun volvió a casa y dixo a los sus padres que se casara. El 3 de Xunetuo ingresó nel 9º hospital de Grozni una moza fería de gravedá. Tuvo dos díes nuna xunidá separtada baxo vixilancia. Dalguién reconocióla, y díxo-ylo a los sus familiares. Les sus dos tíes vinieron pero nun-yos permitieron falar con Madina». El 4 de Xunetu dalgunos axentes personáronse na casa de la familia, encerraron a los pás y les dos hermanes pequeñes de Madina na sala de calderes y prendiéron-y fueu a la casa. Consiguieron apagar el fueu gracies a un vecín, pero al día siguiente «los axentes, que nun se presentaron como tales, traxeron el cuerpu de Madina envueltu nuna mortaxa. Nun-yos permitieron abrira y ordenaron qu’enterraren a la moza ensin facer ruíu». Natalia Estemirova tamién reveló la execución pública d’una persona ocurría’l 7 de Xunetu nel pueblu d’Akhinchu-Borzov.

Mieu

Percorremos la ciudá. A pocos metros de la sede de Memorial, l’antigua avenida de la Victoria ye anguañu avenía Vladimir Putin. Ramzan Kadirov dio-y esi nome l’añu pasáu. El responsable del entamu de la segunda guerra y les sus consecuencies en Chechenia, el restu’l Cáucasu y tola Federación Rusa ye recordáu na principal arteria de Grozni, ente semeyes y lemes qu’afalaguen al presidente actual y al su pá, impuestu por Moscú y muertu n’atentáu de los independentistes en 2004.

La reconstrucción espárdese per tou Grozni, centenares de grúes llevanten sobre les ruines d’una ciudá que foi arrasada dafechu. Son munchos los restos de metralla nos edificios, pero van desapaeciendo a grandes pasos. Resulta chocante que munchos de los obreros de la nueva capital chechena seyan emigrantes d’Azerbayán y otres ex repúbliques soviétiques, mientres la tasa real de paru qu’esiste en Chechenia supera con creces el 70% de la población activa.
Llegamos a un barriu de les afueres. El mozu pídenos que lu llamemos Aslan; «ési yera’l nome del mi torturador». Les sus muñeques muestren l’intentu de suicidiu del su últimu secuestru. «La primer vez foi n’Inguxetia. Taba en casa mi güela cuando se produxo una zachistka. Como nun tinía allí los mis documentos, prindáronme. Tuve un día en Magas y al día siguiente lleváronme n’helicóteru a Osetia’l Norte». Allí tuvo seyes meses, nun gran furacu escaváu na tierra «a una profundidá de tres metros, col agua hasta les rodíes. «Interrogáronme, golpeáronme con bates, torturáronme con ellectrodos y menaciáronme con matar a tola mi familia si nun almitía haber participao nel secuestru de Beslán». Quedó en llibertá a los seyes meses gracies al llabor d’un organismu de drechos humanos, cuando los sus familiares yá teníen cellebráu’l su funeral. «Alcontraron en Pervomaiskaya tres cuerpos enterraos y úno d’ellos paecíase muncho a mí».

Mentir por instintu

Fai un añu repitióse l’infiernu. «Acababa de volver del trabayu cuando asaltaron la casa, entrugáronme’l nome y secuestráronme. Metiéronme nun coche con una bolsa na tiesta y repitiéronse les tortures, con multitú d’interrogatorios. Pero esta vez yéren chechenos». Los xueces nunca-yos ficieron el menor casu a les sus feríes, «riéronse claramente de les mis marques, diciéndome que me pelearía con otros prisioneros. Pidí-yos que me esaminare un mélicu, y se negáronse». Asina, Aslan túvolo claro cuando alcontró una cuchiella de afeitar: «Cuando pierdes tola esperanza, el suicidiu paez la meyor salida».

Aslan fala de lo guapa que tá la ciudá «gracies al nuesu presidente». L’instintu de supervivencia, mecíu col terror hacia cualesquier vecín, faen repetir la coletuca oficial. Intentamos face-y ver que puede espresase con llibertá, que nun vamos mostrar la su cara. «Si nun fuere pola mio familia, poles menacies que llancen ca día na televisión, agora mesmo xuniríame a los mozos na montaña».
L’añu pasáu la detención y muerte d’un disparu na tiesta mientres taba nel coche policial de Magomed Yevloyev, llíder opositor y dueñu de la páxina d’internet ingushetia.org. prevocó una fola protestes qu’acabó col cese del gobiernu de Murat Ziazikov na república d’Inguxetia. El déu acusaor nel últimu crimen de Chechenia apunta claramente al presidente prorrusu. No paez que la «indignación» qu’espresó Dimitri Medvedev-y vaiga llevar a tantu en Chechenia, pero la su credibilidá tamién tá n’entedicho.

Medvedev

El presidente rusu, Dimitri Medvedev, reconoció ayeri que la situación nel Cáucasu Norte sigue siendo «mui mui difícil» y encamentó al Exércitu rusu, a les policíes de cada república y a los servicios de seguridá a una meyor coordinación.

Crasu error
Los analistes aseguren que’l Kremlin cometió un grave error al nun adaptase a la decisión de la guerrilla d’esparder el conflictu fuera de Chechenia y a la su nueva estratexa, qu’opera en pequeños grupos con gran movilidá.

Inguxetia

Tovía convaleciente de les graves feríes tres del atentáu de finales de Xunu, el presidente d’Inguxetia, Iunus-Bek Evkurov, rompió’l su silenciu pa prometer que «elliminaremos» a los rebeldes que nun depongan les armes.

Esbilla | del.icio.us

Dexar un comentariu