Conceyu Asturianu de Solidaridá con Chechenia

Caucasian Knot

La organización en defensa de los drechos humanos Memoria va suspender la su actividá en Chechenia tres el secuestru y asesinatu de la su miembro Natalia Estemoriva.

Sigún afirmó güei Alexander Cherkasov, miembru del Comité Executivu de Memorial, “sabiendo que lo que facemos puede suponer un peligru mortal pa la nuesa xente, nun podemos correr esi riesgu”. Cherkasov nun especificó cuántu tiempu va prolongase esta suspensión, pero afirmó que la decisión tá rellacionada, ente otres coses, cola consternación pola muerte de Natalia Estemirova, miembru de Memorial, sigún informa l’Axencia Interfax.

Oleg Orlov, cabezaleru de Memorial, manifestó pela su parte que la decisión sobre la suspensión temporal del trabayu de la su organización en Chechenia adoptóse na tarde del 17 Xunetu pola Dirección de Memorial.

Unos desconocíos intenten parar el cortexu funerariu d’Estemirova en Chechenia

Per otru lláu, nel trescursu de la ceremonia de despidía de la conocía defensora de los drechos humanos Natalia Estemirova, asesinada’l pasáu día 15, dos homes vestíos de civiles, ún de los cuálos portaba un arma, intentaron parar la comitiva que percorría l’Avenida Putin en Grozni xunto col féretru d’Estemirova.

“QuerÍemos llevar el cuerpu de Natalia Estemirova pela Avenida Putin dende la Plaza de l’Amistá ente los Pueblos, na que tá asitiada la oficina de Memorial en Grozni, hasta la mezquita central de Grozni”, afirmó al corresponsal de Caucasian Knot una de les participantes nel actu, qu’añadió que “queríemos rendi-y un tributu d’esa manera”.

“Caminemos unos 300 metros cuando un coche paró cerca, y salieron dos homes d’él, ún d’ellos con una pistola nel cinturón. Diben vestíos de civil. Con voz alta ya irritada, ún d’ellos pidió desplicaciones de por qué’l funeral taba organizáu asina y de que quién diera permisu pa llevalu a cabu”, afirma la mesma participante, que aseguró que l’incidente duró menos de cinco minutos.

Y añade que “caminemos unes cuántes manzanes más y cuando’l coche col cuerpu de Natasha arrancó, entamemos a dispersanos. Entos volvieron apaecer los homes qu’intentaron parar la nuesa comitiva. Ficieron unes llamaes y apaeció dalgún policía, col qu’entamaron a falar. Pero nesti casu los coches colaron tamién, y los participantes nel actu (unes cien persones) dispersáronse. Nun pudimos llegar a la mezquita, pero por suerte, vimos a Natasha, como queríemos”.

Los participantes na ceremonia de despidía de Natalia Estemirova destacaron tamién que a la mesma nun asistió dengún representante de les autoridaes locales. Nin siquier l’Ombudsman (Defensor del Pueblu) de la República de Chechenia, Nurdi Nukhazhiev, pesie a qu’Estemoriva yera miembru de la Mesa d’Espertos de la Defensoría del Pueblu rusa pa la República de Chechenia y observadora de la Comisión de control públicu pa la observancia de los drechos humanos en centros de detención y asistencia a deteníos y presos.

Esbilla | del.icio.us

Dexar un comentariu