Conceyu Asturianu de Solidaridá con Chechenia

Comunicáu de Memorial

Güei asesinaron a la nuesa collacia y colega, una persona percercana.

Durante casi 10 años Natasha trabayó pa Memorial nel Cáucasu Norte, centrándose especialmente en Chechenia. Natasha nun se dedicaba sólo a recoyer información sobre violaciones de los drechos humanos na zona: yéra una Activista con mayúscules, una gran defensora del Pueblu. Mientres los habitantes de Chechenia se convertíen en víctimes de bombardeos, de “llimpieces”, de secuestros y tortures, Natasha intentaba ayudalos a toos. Desixía un imposible a les autoridaes: acabar cola impunidá. De xemes en cuando consiguíalo. Sentise segura de los sus razonamientos y del drechu que la amparaba-y daba fuercies. Esti trabayu fizo que Natasha fuere conocía en toa Chechenia. Atraía a la xente que buscaba protección, anque fuere pa intentar que la impunidá nun quedare silenciada.

Munches vegaes foi menaciada por funcionarios de diferentes graos, pero ella nun quería dexar el su trabayu en Chechenia, la su patria.

Oleg Orlov, presidente del Conseyu de la organización Memoria, afirma al respectu:

“Sé, de xuru, quien ye’l culpable de la muerte de Natasha Estemirova. Toos conocemos a esta persona. Llámase Ramzan Kadirov, ye’l Presidente de la República de Chechenia. Ramzan menació a Natasha, insultábala constantemente, considerábala la su enemiga personal. Desconocemos si foi él quien ordenó l’asesinatu de Natasha o fueron los sus conseyeros más prósimos pa complacelu. Y mientres tantu, paez que al Presidente Medvedev-y va vinir bien tener a un asesín dirixendo una de les repúbliques que formen parte de la Federación Rusa.

Cuando Natasha criticó que les autoridaes obligaben a les moces chechenes a poner un pañuelu na tiesta en llugares públicos, mantuvo una conversación con Kadirov. Desplicó que Kadirov menacióla y pronunció les siguientes pallabres: “sí, tengo les manes manchaes de sangre, y nun me da vergoña. Maté y siguiré matando a xente mala. Tamos lluchando contra los enemigos de la República”.

Los últimos informes de Natasha, que denunciaben nuevos secuestros, execuciones estraxudiciales y fusilamientos públicos, indignaron a les autoridaes chechenes. Asina-yo aseguraba al director de la nuesa oficina en Grozni el supuestu Defensor del Pueblu chechenu, Nurdi Nukhadzhiev. Dixo que nun quería que pasare nada, y por eso habia que criticar y “reprender” a los defensores de los drechos humanos.

Asumimos un riesgo que resultó inxustificáu. Y sentímonos mui culpables.

Agora queremos falar llamando a les coses pol su nome: en Rusia reina’l terrorismu d’Estáu. Sabemos que se producen asesinatos dientru y fuera de Chechenia. Maten a los qu’intenten dicir la verdá, a los que critiquen a les autoridaes. Ramzan Kadirov fizo imposible’l trabayu de los activistes en Chechenia. Los que mataron a Natasha queríen parar esti fluxu d’información verídica que salía de Chechenia.

Y puede que lo consiguieren.

Esbilla | del.icio.us

Dexar un comentariu