LES TORTURES A CHECHENOS DE PUTIN
Jamie Glazov, pa FrontPageMagazine.com
FrontPage entrevista nesta ocasión a Yelena Maglevannaya, una periodista de Volvograo que pidió asilu políticu en Finlandia fai delles selmanes. Sufre persecución en Rusia por escribir sobre les tortures a chechenos en prisones ruses. Tamién fizo campaña en defensa de presos políticos como Mikhail Trepashkin, y desixó la derogación de les Lleis de Xunetu de 2006 que permiten al Kremlin asesinar a los enemigos de Rusia, amás de xestionar una web dedicada a la memoria d’Alexander Litvinenko.
Fálanos de los fechos que te ficieron colar de Rusia.
La principal razón pola que decidí colar de Rusia foi la menacia a la mio llibertá, incluso a la mio vida, si yo quedaba allí. Les autoridaes taben fabricando cargos penales contra mí desque refugué acatar la inxusta sentencia xudicial d’asoleyar una refutación de los mis artículos y pagar “daños y perxuicios por difamacion” a los guardies de la prisión. Amás, recibí menacies d’organizaciones nacionalistes ruses, yá que yo defendía los drechos de los chechenos, “enemigos de Rusia”. El FSB citóme en delles ocasiones por “entrevistes” y alvirtióme de que podría correr un gran peligru si nun dexaba de facer eses entrevistes. Too esto llevóme a tomar la decisión de colar.
¿Qué clas de cargos penales fueron fabricaos na tu contra?
Los cargos fueron que yo difamé contra l’alministración del campu de prisioneros LIU-15, en Volvograo. Nos mios artículos yo afirmé, la verdá, que los guardes del campu golpearan repetidamente a un prisioneru proviniente de Chechenia, Zubair Zubairaev. Por embargu, l’alministración del campu denuncióme. La “independencia” de los tribunales rusos ye bien conocía polo que, por supuesto, ganaron el xuiciu. Fí condergada a retractame de los mios artículos y a pagar 200.000 rublos (4.430 euros) por daños a los guardies de la prisión. Yo neguéme dafechu a cumplir esta sentencia.
Por cierto, fai poco enteréme de que punxeron una denuncia asemeyada contra Malika Zubairaeva, la hermana de Zubair.
¿De qué forma son violaos los drechos de los chechenos?
Violación de drechos ye una descripción persuave. Los chechenos son golpeaos colos pies clavaos en suelu, como nel casu del citáu Zubair Zubairaev, empalaos con barres de fierru y atacaos con perros de presa, como nel casu d’Islam Taipov nel campu de prisioneros IK-3, en Tomsk. A Zaurbek Talkhigov, encarceláu por intentar mediar nel rescate de los rehenes del Nord-Ost, ñegóse-y una operación quirúrxica vital o cualesquier tratamientu mélicu cuando taba gravemente enfermu. Nun fai falta recordar que pasen casi tola conderga en celdes de castigu, nunes condiciones escandalosamente dures con fríu y humedá.
¿Por qué tá oprimiendo’l Gobiernu rusu a los chechenos?
Anque los llíderes rusos vienen constantemente afirmando que les aiciones militares en Chechenia yá acabaron, los chechenos siguen siendo trataos en Rusia como enemigos. Cuando son encarcelaos, davezu son custodiaos por xente que lluchó contra ellos nes tropes federales durante la guerra, y anguañu trabayen nos campos de prisioneros. Por instintu los antiguos verdugos anguañu abusen de los indefensos chechenos.
Per otru lláu, yá sintí delles vegaes de dellos funcionarios del Serviciu Penitenciariu Federal, asina como de los propios prisioneros chechenos, que los más altos cargos de Rusia dieron órdenes de destruyir a los presos chechenos. Asina, el xefe del campu de prisioneros IK-25 díxo-y a Zubairaev que teníen órdenes de destruyir a los mozos chechenos nes prisiones, y que dempués la nación apagaríase ella sola.
¿Qué menacia suponen los chechenos pa Rusia?
Nun creo que los chechenos constituyan una menacia pa Rusia en dengún sen. ¿Qué tipu de menacia pueden ser? Namás quieren ser llibre, vivir la so propia vida independiente de Rusia. Pero la sociedá rusa, por supuesto por influencia principalmente de la propaganda oficial, ve a los chechenos como enemigos, como una menacia. Les autoridaes usen constantemente los medios pa imponer una visión de tola nación chechena como una nación de gangsters y terroristes. Nun ye d’estrañar qu’esta opinión seya compartía agora pola mayoría de la población rusa.
Por embargu, tá lloñe de la realidá el fechu de que los chechenos seyan culpables de los más notorios ataques terroristes atribuyíos a ellos, como los españíos de los bloques d’apartamentos en Moscú o l’infame ataque en Beslán. Shamil Basayev reivindicó l’autoría del ataque terrorista en Beslán cuando yá pasara un tiempu. Ye posible que lo ficiera baxo presión o a cambiu de delles proemses de les autoridaes ruses. Una montonera xente en Rusia afirma abiertamente que los servicios secretos rusos tuvieron involucraos nestos ataques terroristes.
Bien, ¿entós qué menacia supón la independencia de Chechenia pa Rusia? Evidentemente supón dalgún tipu de menacia pa los intereses de Putin, ¿cuálos son esos intereses? El réximen de Putin persigue a los chechenos por dalgo más que vagues ya indiscriminaes razones. Los chechenos son oxetivu porque nes mentes del réximen de Putin ellos suponen una menacia. ¿Cuála ye esta menacia? ¿Cómo puede la Rusia de Putin creer que la independencia de Chechenia diba perxudicar a Rusia? ¿Qué tién Chechenia pa que Rusia necesite tenela baxo’l su control?
Los chechenos son un pelligru, lo primero de too, porque aspiren a la llibertá. Son una nación que nunca foi esclavizada, y el réximen de Putin prefier a la xente con mentalidá esclava.
Una Chechenia independiente volveríase próspera bien ceo. Los chechenos nacieron constructores, creadores, con ganes y capacidá pa trabayar duro y p’algamar una vida buena y saludable. Chechenia foi reducía a escombros munches vegaes, pero a la mínima oportunidá volvieron a llevantase, a recostruyir el su país. Faerán grandes y sólidos edificios de cinco o seyes plantes pa velos destruyíos durante la prósima agresión rusa. Esto pesie al fechu de que Chechenia nunca nun foi realmente llibre, sinon que siempres tuvo baxo la bota del so vecín del norte.
Per otru lláu, una Chechenia independiente podría ser un exemplu de democracia xenuina, porque los chechenos nun tienen tradición d’obedecer a dictadores. Dende’l puntu de vista del réximen rusu, esto diba ser un mal exemplu pa los rusos: una república llibre y próspera vecina de la probe y tradicionalmente oprimía Rusia.
P’acabar, los chechenos inclináronse siempre hacia Occidente, lo que ye mortal pal réximen rusu. Occidente tá equivocándose al presta-yos tan poca atención a los chechenos. Mientres Rusia tá intentando presentalos como fanáticos reaccionarios, en realidá son una nación con una cultura perfectamente europea y unes tradiciones democrátiques bien enraigonaes, que quier vivir sigún los estándares occidentales. Por ello, cuando munchos países occidentales cierren les sus fronteres a los refuxaos de Chechenia, tán cometiendo un error. Los chechenos son aliaos naturales d’Occidente, y por eso l’actual réximen ruso los ve como una menacia.
¿Cuálu ye’l nivel de persecución de los periodistes y activistes polos drechos humanos en Rusia?
El periodismu honestu convirtióse en prácticamente imposible na Rusia d’anguañu. Los periodistes tán siendo asesinaos (Anna Politkovskaya foi’l casu más conocíu, pero non l’únicu), golpeaos, encarcelaos… Fai poques feches hebio un casu escandalosu n’Ulyanovsk, cuando’l periodista Sergei Krukov foi secuestráu en su casa. Frayaron la su puerta, y foi sacáu de casa.
Namás aquellos periodistes que sirven al réximen pueden disfrutar de la su vida. Y lo mesmo podemos dicir de los activistes polos drechos humanos.
Fai poco en Yekaterinburg, l’activista polos drechos de los presos Alexei Sokolov foi arrestáu baxo unes acusaciones falseaes. Y la situación ta poniéndose cada vuelta peor.
¿Cuálu ye’l paraderu de Sergei Krukov y Alexei Sokolov? ¿qué-yos pasó?
Alexei Sokolov foi arrestáu el 13 de Mayu y sigue deteníu. Ensin dulda, esto pasó como venganza poles sos actividaes en pro de los drechos humanos. Más recientemente, otros dos activistes polos drechos humanos, Gleb Edelev y Vyacheslav Bashkov, fueron deteníos tamién n’Ekaterimburgu. Fueron acusaos de convocar protestes non autorizaes, y tuvieron deteníos hasta qu’acabó la cumbre de la Organización de Cooperación de Xangai n’Ekaterimburgu.
El paraderu de Sergei Krukov podría ser incluso más tráxicu. Nun hai noticies d’él dende’l 21 d’Abril, cuando’l su apartamentu foi asaltáu y él foi prindáu y lleváu nuna dirección desconocía. Quiciavis fuera treslladáu a un hospital siquiátricu d’alta seguridá. Poco dempués de la su detención, la Fiscalía emitió una orden pa face-y un examen siquiátricu forzosu.
¿Qué nos puedes dicir sobre les tortures y la situación xeneral nes prisiones ruses?
La tortura ye daqué endémico nes nuestres prisiones. Nun toi falando sólo de duros golpes, sinon de métodos braeramente sádicos de tortura: los prisioneros son atacaos por perros de caza, empalaos con barres de fierru, y los sus pies clavaos en suelu. Tolos presos sufren humildaciones, pero amás ciertos grupos –musulmanes, xentes del Cáucasu, y particularmente los chechenos- son los más odiaos.
Les condiciones en prisión son horribles. Les celdes son pequeñes y tán saturaes, asfisiantes pel branu y fríes y húmedes n’iviernu. Pero, por supuesto, lo peor de too ye la constante humildación pola parte de los carceleros. Tan a menudu que lleva lliteralmente a la xente al suicidiu. Quince años en prisión consideráse lo mesmo qu’un conderga perpetua.
¿Por qué ye tan prevalente’l sadismu nes cárceles ruses? Sí, ye parte de la condición humana cuando la xente siéntese con poder sobre otres persones. ¿Ye dalgo que reflexa cómo ye’l réximen de Putin? La tortura nun ocurre pesie a Putin sinon gracies a él, ¿verdá? La inhumanidá espárdese dende’l réximen hasta’l sistema penitenciariu.
Sí, asina ye. Putin paez ser mui cruel o, pa ser más precisos, un home despiadao, ensin corazón. ¿Alcordáisvos de la su infame rempuesta: “fundió”, dempués del desastre del submarín Kursk, nel que morrió tola su tripulación? ¿y la so reacción a los asesinatos de Politkovskaya y Litvinenko, cuando lliteralmente escupió les pallabres de condolencia? ¿o cuando llamó a un guerrilleru chechenu cautivu “un animal”? ¿ y qué dicir de los sus chistes de que’l fedor de los cuerpos y los calabozos de Lubyanka llega a un kilómetru de distancia? Eso por nun falar del so llamáu a “usalos nun depósitu de mierda”. ¿Puede una persona normal dicir estes coses?. Nun toi segura de qu’esta persona seya capaz de tener dengún sentimientu humanu, nin compasión nin dengún otru. Paezme un robot ensin alma. Y tolos sus subordinaos siguen l’exemplu del xefe, asina que tol sistema ye igual.
¿Qué puede y ha facer Occidente respecto a Putin? ¿cuála sedría la tu petición a l’alministración Obama? ¿tién qu’esmolecese’l réximen rusu polo que pueda pensar o facer Occidente o los EEXX?
¿Qué qué puede facer Obama? Primero de too, dexar de coquetear con él. Dexar de pensar qu’esiste cualesquier cosa asemeyada a democracia en Rusia. Rusia sigue siendo’l mesmu imperiu malignu que yá fuera nel pasáu.
El puntu débil de los actuales llíderes rusos ye’l su monederu. Munchos d’ellos tienen cuentes bancaries n’Occidente. Eso ye realmente lo que tienen miéu a perder, a diferencia de la “imaxen” abstracta de que namás que-yos esmolez esto porque podríen ver dañaos los sus asuntos financieros. Ellos ven que, pesie a les declaraciones altisonantes que se dan de xemes en cuando, Occidente nun muestra una intención real de’amenorgar la su cooperación con Rusia. Asina que’l réximen rusu vuélvese tovía más insolente: “faigamos lo que faigamos, ellos van facer un pequeñu baruyu y llueu van relaxar na su opinión sobre nós”. Esto llegó tan lloñe como pa cometer un ataque terrorista radioactivu nel centru de Londres, l’asesinatu de Litvinenko. Y puede dir más lloñe si los llíderes europeos y americanos nun dexen de rii-yos les gracies a Putin y Medvedev. Hai que ser realmente duros, presionar de verdá, aplicar les más dures sanciones poles aiciones d’esti tipu, y nun quedar namás en declaraciones y conversaciones.
Esbilla
del.icio.us
Nun hai comentarios »