Conceyu Asturianu de Solidaridá con Chechenia

Soldaos rusos de la rexón d’Altay golpearon el pasáu fin de selmana a 44 reclutes daguestanís, l’últimu indicativu del continuu deterioru de les rellaciones inter-étniques nel Exércitu rusu y que revela qu’esiste un pelligru tan real que en dalgunes xunidaes el mandu y el control podríen tar cercanes a venir abaxo.

Lo que pasó esactamente nesti aislláu acuartelamientu sigue siendo materia de debate. Sigún el Comité de Madres de Soldaos en Daguestán, los reclutes d’esta república del Cáucasu Norte foron llamaos y puestos delantre de les tropes ruses, que-yos golpearon tan duramente que los daguestanís teníen “miéu a ser asesinaos” si volvíen a les sus xunidaes.

Supuestamente dalgunos de los que atacaron a los daguestanís usaron cadenes pa face-yos feríes, y, causao por estos enfrentamientos, unos 50 soldaos daguestanís del acuartelamientu de la rexón d’Altay declararon una fuelga fame, afirmando que “nun diben comer nin beber hasta que los treslladaren a otra xunidá”.

Pero los fiscales militares del Distritu Militar de Siberia a los que los daguestanís recurrieron afirmen que la violencia foi resultáu “d’una disputa que foi a más” na que “naide nun sufrió graves consecuencies”, pesie a que los fiscales sabíen que “dellos soldaos recibieron asistencia sanitaria”.

Los fiscales de la rexón añadieron que taben investigando la situación y que los oficiales d’altu rangu taben comprobando qué mandos sobre’l terrenu podríen ser responsables de prevenir estes rellaciones “non habituales” ente los soldaos. Dependiendo de los resultaos d’esta investigación, dalgunos oficiales podríen resultar espedientaos.

A causa del númberu de soldaos implicaos y de la esperiencia colos medios de comunicación del Comité daguestaní de Madres de Soldaos, esti casu en concretu, anque con solombres y duldes nos detalles, llamó l’atención de toles axencies de noticies y periódicos de Moscú y parte de Rusia nes 48 hores siguientes.

Y esti casu tuvo l’efectu de llamar l’atención sobre la manera na que les rellaciones ente dellos grupos étnicos dientru l’Exércitu rusu lleven deteriorándose nos últimos años de que tanto’l maltar ente los oficiales pola reducción del númberu d’éstos, como los problemes coles últimes llamaes a files tán cercanos a empeorar abondo la situación nos prósimos meses.

La selmana pasada’l Ministru de Defensa Anatoly Serdyukov afirmó que’l númberu de delitos cometíos poos oficiales rusos aumentó nun 33% l’añu pasáu, un reflexu de lo qu’él indicó como un insuficiente nivel de conocimientu de la Llei y de la eficacia del mandu y el control.

Los sus subordinaos indicaron que’l númberu de soldaos que fueron víctimes de les aiciones de los sus oficiales creció hasta los 1082, pero esta cifra namás inclúi a aquellos que sufrieron les aiciones de 280 oficiales que fueron castigaos por estos delitos. El númberu real podría ser bastante mayor.

Una de les razones d’esti aumentu de los delitos y en concreto de les aiciones contra los subordinaos ye’l sentimientu d’impunidá por cualesquier cosa que faigan que tienen dalgunos oficiales, pero otra razón, quizás más importante, ye que munchos oficiales ven el su futuru inciertu como resultáu de la disminución d’efectivos del Exércitu y les sus probes perspectives fuera d’él.

Sigún una encuesta fecha nel portal SuperJob, el 34% de les empreses ruses dicen que nun quieren contratar antiguos oficiales porque “l’Exércitu priva a les persones de la capacidá de pensar y mostrar iniciativa” y porque los antiguos oficiales que contrataron nel pasáu nun trabayaben nada.

Estos problemes nun se ciñen namás a los cuerpos d’oficiales. L’actual ciclu de soldaos de reemplazu nun ye sólo ún de los más criminalizaos nos últimos años, sino qu’amás la mitá de los soldaos d’esti reemplazu tuvieron problemes cola Llei. Más de 100.000 d’estos soldaos tienen la conderga suspendía, y ente 50.000 y 70.000 fueron encarcelaos.

Los antecedentes penales de los reclutes, la criminalizada forma nel que’l propiu reclutamientu se llevó a cau y el maltar de los oficiales tán combinándose pa crear una situación esplosiva. El Comité de Madres de Soldaos alvierte de que les condiciones del Exércitu rusu son les mesmes que durante la guerra en Chechenia.

Yuri Gladysh, comentarista de la web Kasparov.ru, afirma que “l’actual Exércitu rusu convirtióse nun furacu negru”, nel que un recluta “pierde darréu tolos sos drechos civiles” y se convierte asina en parte de “un exércitu d’esclavos ensin drechos” cuya conda conducta ye poco probable que seya profesional.

Pero quiciavis el meyor testimoniu del gráu de peligrosidá tá garrando la situación aportólu Dmitry Artemyev, un soldáu rusu que desertó de la su xunidá y buscó abellugu en Xorxa. Afirmó que “nun fuxí del mi país, sinon de les novataes nel exércitu del mi país”.

Esbilla | del.icio.us

Dexar un comentariu