Conceyu Asturianu de Solidaridá con Chechenia

Paul Globe

L’Exércitu rusu consiguió l’oxetivu soviéticu de convertise nun braeru exércitu “de trabayadores y campesinos”, como resultáu de l’amplia exención del cumplimientu del serviciu militar pola parte de los fíos de los ricos y poderosos, lo que tá creando un gran maltar ente aquellos que se ven forciaos a servir y tá frayando lo que yera ún de los más importantes enllaces ente’l lliderazgu soviéticu y el Pueblu durante la II Guerra Mundial.

Nesi conflictu, los fíos de los funcionarios d’altu rangu del Partíu Comunista y l’Estáu soviéticu, dende’l propiu Stalin p’abaxo, sirvieron nel Exércitu Colloráu y en munchos casos fueron capturaos o morrieron, un indicativu de que na mayoría los casos nun recibíen el tratamientu especial que los fíos de la élite post-soviética paecen tener.

Nun artículu nel númberu d’esta selmana d’Argumenty nedeli, Nadezhda Popova nun sólo cita exemplos de l’actual tendencia de que “los fíos de buena familia nun quieren servir nel Exércitu”, sinon qu’ufre tamién dellos comentarios que suxeren un xorreciente maltar popular respecto a esti asuntu.

La periodista afirma que “quier clarificar cuálos de los fíos de “buena familia” sirvieron o tan sirviendo nel exércitu y cuálos s’escaqueen de facelo”. Yá que ye dalgo que les autoridaes nun tienen interés en conocer polo menos hasta’l momentu, l’artículu consiste nuna riestra d’anécdotes y llistes.

Dalgunos de los casos son abondo inquietantes. Popova cuenta que’l fíu de Nikolay Denin, Gobernador de Bryansk, foi llamáu a files en 2007 pero los funcionarios locales-y concedieron un aplazamientu pa que pudiere… participar en negocios privaos. Como resultáu d’esto, añade Popova, “envede’l xóven Denin dalgún otru foi al Exércitu, dalguién cuyu padre (o madre) nun yéra Gobernador”.

Peor tovía, pol menos no que a hipocresía se refier, foi’l casu del actor de cine Aleksey Chadov. Anque tuvo un papel principal nuna película bélica, “La 9ª Compañía”, nun respondió a la llamada a files. Les autoridaes militares aseguraron que diben llevalu a la cárcel. Pero les sus poderoses amistaes lu protexeron y Chadov tovía actúa en público.

Munchos otros actores y artistes tamién eludieron el serviciu militar durante la última década, afirma la periodista del Argumenty nedeli. Ente ellos taba’l pianista Yevgeny Kisin, cuya evasión pública del serviciu militar prevocó que’l Ministru de Defensa en 2005, Sergey Ivanov, denunciare a los “baillarines ya instrumentistes de balalaika que nun quieren servir al su país”.

(Kisin evitó’l serviciu militar, apunta Popova, pol cenciellu fechu de tener una recomendación personal del Presidente Boris Yeltsin. Pero na época de Yeltsin, diz Popova, “ún tenía que ser polo menos un pianista de sonadía muncial y non un meru emplegáu de banca o home de negocios con apellíu de buena familia”, como paez que tá pasando dende aquelles feches p’acá).

Ente los fíos de políticos y otros altos cargos que refugaron el serviciu militar, añade la periodista, tán Pavel Fradkov, Vladimir y Stanislav Yastrzhemsky, Dimitry Gryzlov, Vladimir Kiriyenko, Igor Lebedev, el fíu de Vladimir Zhirinovsky y tamién los dos fíos del antiguu ministru de Defensa Sergey Ivanov.

Pero si los fíos de munchos de los miembros de l’actual élite rusa tán evadiendo’l cumplimientu del serviciu militar con una escusa u otra, hailos que nun lo faen. Dos de los actuales siete ministros sirvieron nel Exércitu. Amás, los dos fíos del Xeneral del Éxercitu Anatoly Kvashnin tamién lo ficieron, y ente los soldaos muertos en Chechenia, más de 30 yéren fíos de militares d’altu rangu.

Pa los fíos de los trabayadires y campesinos, pol contrariu el serviciu militar sigue siendo casi universal, menos p’aquellos que tienen graves problemes de salú, tienen prórroga por estudios, o planeen paga-y un sobornu a los funcionarios que trabayen nes oficines de reclutamientu, sobornu que, como indica Popova, tá demasiao solicitáu.

Por mor de que l’actual ciclu de reclutamientu tá afectando a cada vez más xente, el fechu de que dalgunos seyan quién a eludir el serviciu militar mientres qu’otros nun pueden, ye especialmente sensible en gran medía polos frecuentes fechos tráxicos que se conocen sobre la vida militar rusa y porque hai un sentir cada vuelta mayor ente munchos rusos de que tol sistema tá a la escontra d’ellos.

De fechu, los rusos d’a pie creen cada vuelta más mayoritariamente que los ricos y poderosos y los sus fíos viven como si tuvieren “n’otru planeta, perlloñe de los demás”, un sentimientu qu’amás mina’l tipu de cohesión social que cualesquier país necesita y que puede españar en tiempos de crisis.

Popova acaba’l su artículu cola siguiente entruga: dada la desgana de los fíos de los ricos y poderosos en facer el serviciu militar y y dao que pasen el tiempu conduciendo Mercedes o “mercando ésta o aquella islla o factoría”, ¿qué-yos pasaría a Rusia y el su Pueblu si mañana hai una guerra?.

Esbilla | del.icio.us

Dexar un comentariu