Conceyu Asturianu de Solidaridá con Chechenia

Les autoridaes federales ruses y chechenes han parar darréu los incendios de cases y otros castigos colectivos contra familiares de supuestos insurxentes en Chechenia, y emprenda les aiciones necesaries pa que los perpretadores de violaciones de Drechos Humanos na rexón rindan cuentes énte la Llei, afirmó Human Rights Watch nun comunicáu asoleyáu la selmana pasada.

L’informe de 53 páxines, tituláu “Lo que los sus neños-y entrugarán: punitivos incendios de cases en Chechenia”, documenta una pauta d’incencios de cases a cargu de les fuercies de seguridá pa castigar a les families poles supuestes aiciones de los sus familiares.

“Rusia aseguró que la “operación antiterrorista” en Chechenia tá acabada, pero lo que nun lo tán son les violaciones a los Drechos Humanos”, afirma Tanya Lokshina, vicedirectora de la oficina en Rusia de Human Rights Watch, quien añade que “quemar les cases de la xente polos supuestos pecaos de los sus familiares ye una táctica criminal, y nun hai razón denguna pola que’l Gobiernu nun pueda aparar esto y pidi-yos responsables a los culpables”.

En 2008, funcionarios chechenos d’altu rangu, incluyíu’l Presidente Ramzan Kadyrov, ficieron declaraciones oficiales afirmando que los familiares de los insurxentes habríen esperar ser castigaos hasta que convencieren a los sus familiares de que se rindieren. Los insurxentes usen tamién una variedá de táctiques violentes, incluyíes la quema de cases, contra miembros y simpatizantes de les autoridaes chechenes pro-ruses.

“L’usu de táctiques espantoses ya illegales pela parte de los guerrilleros rebeldes nun xustifica l’usu de táctiques asemeyaes pela parte de les fuercies gubernamentales que lluchen contra la insurxencia”, afirma Lokshina.

L’Informe de Human Rights Watch documenta 13 de los 26 casos de quemes punitives de cases ente Xunu de 2008 y Xunu de 2009 que pueden ser atribuyíes a les fuercies de seguridá chechenes n’ocho distritos de Chechenia. El casu más reciente tuvo llugar el pasáu 18 de Xunu. La organización pa los Drechos Humanos Memorial, la principal organización humanitaria que trabaya nel Cáucasu Norte, informó de qu’alrodiu les 5 la mañana miembros de les fuercies de seguridá quemaron dos cases pertenecientes a los ancianos padres d’un supuestu insurxente na localidá d’Engel-Yurt, nel distritu de Gudermes.

Les quemes de cases detallaes nel informe de Human Rights Watch son llevaes a cabu, polo xeneral, de nuechi, cuando miembros de los cuerpos de seguridá lleguen –a menudo encapuchaos- en dellos coches, entren nes cases y obliguen a los sus residentes a salir d’elles. Los atacantes impiden a los residentes averase a la su casa, tratándolos con violencia y en dellos casos manteniéndolos encañonaos coles sus armes. Los asaltantes pasen dempués a prender les cases metódicamente y ensin prieses y queden durante más d’una hora mirando como esparde’l fueu, asegurándose asina de que los residentes o los sus vecinos nun intenten apagar el fueu antes de que la casa tá dafechu en llames.

A les víctimes d’estos fechos se-yos dexa bien claro que si denuncien a les autoridaes pueden sufrir dures repercusiones. Ye por ello que namás 3 víctimes de los casos conocíos por Human Rights Watch denunciaron oficialmente los fechos. N’otros 3 casos, les víctimes llegaron a un alcuerdu con Memorial pa denunciar los fechos énte les autoridaes. Hasta’l momentu les autoridaes nun abrieron nin una sola investigación poles denuncies de quema de cases en Chechenia.

El Gobiernu rusu falló estrepitosamente al nun investigar y pidi-yos cuentes a los culpables de les violaciones de los Drechos Humanos durante una década de guerra y contrainsurxencia en Chechenia. Un funcionariu del gobiernu chechenu cuntó-y a Human Rights Watch qu’esti fallu ayudó a crear en Chechenia una aceptacion de la impunidá como norma.

Sigún Lokshina, “los ataques impunes contra los Drechos Humanos en Chechenia son una perversión de la xusticia y nun habríen ser toleraos. Los culpables han ser castigaos”.

En más de 100 xuicios cellebraos hasta la fecha, el Tribunal Européu de Drechos Humanos consideró a Rusia culpable de graves violaciones de los Drechos Humanos en Chechenia. Human Rights Watch fizo-y un llamáu al Gobiernu rusu pa qu’asegure que les sentencies d’estos casos seyan llevaos a cabu con eficacia.

Lokshina asegura que “el cumplimientu total de les sentencies del Tribunal Européu ye una de les meyores maneres d’acabar cola impunidá en Chechenia. Nun clima de responsabilidá ye difícil d’imaxinar que crimenes como la quema de cases tengan llugar”.

Esbilla | del.icio.us

Dexar un comentariu