Conceyu Asturianu de Solidaridá con Chechenia

Sigún informaba’l diariu israelí Arutz Sheva’l pasáu día 5, l’exércitu sionista vién faciendo llamaos a los sus reservistes pa que s’allisten de cara a la invasión y xenocidiu que tá llevando a cabu.

Ente los reservistes que s’allisten con más entusiasmu a la masacare sobre’l pueblu palestín afayaríense francotiradores rusos que yá tuvieron destinaos en Gaza fai nel exércitu sionista fai 4 años, y que sedríen veteranos de les guerres d’Afganistán y Chechenia.

Hai que recordar que nun ye la primer vez que l’exércitu sionista israelí saca xugu de la “esperiencia” d’estos francotiradores, yá que éstos participaron tamién na ofensiva d’Israel contra’l Líbanu ente Xunetu y Agostu de 2006, talu y como yá informó’l Conceyu Asturianu de Solidaridá con Chechenia n’Agostu de 2006.

Y ye que Roma nun paga traidores. Cola collaboración col exércitu sionista ye como-y paguen estos veteranos rusos a Mahmud Abbas, presidente de l’Autoridá Palestina, y a Khaled Mashaal, líder de Hamas, los sus favores políticos al imperialismu zarista rusu. Mahmud Abbas declaró públicamente’l pasáu 21 d’Avientu del añu recién acabáu en Grozni, capital de Chechenia, que sentía un profundu respetu por toes aquelles persones que sufrieron y vencieron al “terrorismu chechenu”, refiriéndose con ésti términu a la resistencia independentista d’ésti país, y eloxaba’l llabor del torturador collaboracionista chechenu Ramzan Kadyrov nesa xera, mientres que Mashaal afirmaba en Marzu de 2006 que’l conflictu ruso-chechenu yera un asuntu internu rusu y que Hamas nun interfier n’asuntos d’otros Estaos, ninguneando y ñegando d’esta manera la heróica resistencia del pueblu chechenu a los xenocides rusos dende Avientu de 1994, y xustificando d’igual mena la barbarie rusa que causó en Chechenia más de 200.000 muertos y 150.000 refuxaos y refuxaes.

Pesie a estes pallabres y a estos fechos de los líderes de les principales facciones palestines, el Conceyu Asturianu de Solidaridá con Chechenia quier refugar enérxicamente la invasión y la masacre sionista en Gaza, y fai un llamáu a tolos asturianos y asturianes a llevar a cabu cuantes aiciones considere oportunes pa denunciar l’actitú del Estáu sionista.

Asinamesmo, el Conceyu Asturianu de Solidaridá con Chechenia nun quier dexar escapar la ocasión de denunciar públicamente tamién la hipocresía y doble raseru del PSOE, que participa na convocatoria d’una manifestación n’Uviéu pal prósimu xueves pol fin de les agresiones a Gaza, mientres nun mueve un déu a nivel políticu y diplomáticu, y mientres apreba órdenes d’estradición contra Murad Gasayev, un ciudadanu chechenu deportáu ensin prebes conocíes que lo xustifiquen y cuya integridá física y moral, ya incluso la su vida, cuerren seriu peligru, lo que demuestra l’escasu compromisu de la política esterior del PSOE y del Gobiernu español a la hora de defender los derechos humanos más ellementales.

Contra l’imperialismu sionista y zarista. La solidaridá ye la ternura de los pueblos. Puxa Palestina llibre y xunificada. Puxa Chechenia llibre.

Esbilla | del.icio.us

Dexar un comentariu