Conceyu Asturianu de Solidaridá con Chechenia

Caucasian Knot

Un comunicáu asoleyáu va pocos díes pol su serviciu de prensa, el Conceyu de Refuxaos Chechenos n’Azerbayán asegura que los refuxaos que viven anguañu n’Azerbayán quieren colar d’esti país por considerar que la su vida y llibertá tán menaciaos.

“Pesie a tolos alcuerdos internacionales, Azerbayán deportó de nueu a un refuxáu chechenu, nesti casu a Suleiman Ayubov, a Rusia ensin denguna investigación nin xuiciu”, afirma’l comunicáu.

Suleiman Ayubov, una persona con invalidez y padre de dos neños, ún d’ellos tamién inválidu, vivía n’Azerbayán dende’l 2000. En 2002 la oficina del Altu Comisionáu de les Naciones Xuníes pa los Refuxaos n’Azerbayán reconoció-y’l status de refuxáu. Por embargu, foi estraditáu a Rusia al pidilo les autoridaes xudiciales d’ésti país.

“Nun tamos contra la xusticia, sinon contra los xuicios inxustos y les desapaiciones. Nes condiciones actuales, el Conceyu de Refuxaos Chechenos n’Azerbayán tomó’l determín d’organizar el treslláu de los refuxaos a un tercer país y buscar el sofitu de tola xente de bien, les organizaciones internacionales y los gobiernos d’otros países”, continúa’l documentu.

Amás, el comunicáu destaca qu’ente 1999 y 2008 les autoridaes azerines estraditaron illegalmente a Rusia a 27 persones. Docenes de refuxaos chechenos fueron arrestaos y agora tán en prisiones azerines. Nun se sabe’l númberu esactu d’estos presos.

Pela so banda, les autoridaes aseguren que ye difícil ayudar a los refuxaos por culpa de la su situación illegal nel país, mientres que la estradición de dalgunos d’ellos fáise en cumplimientu d’un alcuerdu ente Azerbayán y Rusia en materia d’asistencia llegal, y que tá aprebáu pol Conseyu d’Europa.

Los refuxaos en Xeorxa recibirán pasaportes

Per otru lláu, sigún informa The Messenger Online, los refuxaos chechenos recibirán pasaportes xeorxanos que-yos permitan viaxar al esterior, sigún anunció’l Ministeriu de Xusticia d’eso país.

L’Axencia del Rexistru Civil entamó a espedir permisos de residencia a los refuxaos fai un añu, ya la cifra de permisos hasta la fecha supera los 1000.

Los refuxaos antes carecíen de la documentación necesaria pa poder viaxar al esterior.

Los pasaportes entamarán a repartise a finales de 2008 o entamos del 2009.

Esbilla | del.icio.us

Dexar un comentariu