Conceyu Asturianu de Solidaridá con Chechenia

Reuters

El pasáu vienres activistes de Derechos Humanos informaron del descubrimientu d’una fosa común con unos 800 cuerpos, la mayoría d’ellos de civiles, en Grozni, la capital de Chechenia.

Sigún afirmó Rosa Satuyeva, vocera de Nurdi Nukhadzhiyev representante pa los Derechos Humanos en Grozni, “un ciudadanu de Grozni, Arbi Tuzhayev, pidió-y a Nukhadzhiyev que se señalare’l sitiu del cementeriu cristianu de la ciudá onde fueron enterraes unes 800 persones ente’l 2 de Xineru y el 31 d’Ochobre de 1995”.

Nurdi Nukhadzhiyev ye’l representante de Rusia pa los Derechos Humanos en Chechenia.

Sigún añadió Satuyeva, “Tuzhayev aseguró que trabayó nun equipu de voluntarios que recoyía y enterraba calabres en 1995, durante los combates en Grozni. Añadió que la mayoría de los cuerpos pertenecíen a civiles”.

Sigún Tuzhayev, “les cais de Grozni y les carreteres taben plagaes de soldaos, guerrilleros y civiles muertos, y alcontramos abondos cuerpos casi desfechos”.

Satuyeva afirma que los cuerpos fueron treslladaos al sitiu indicáu polos militares, que “facíen semeyes de los cuerpos, los anotaben y describíen, y poníen un numbéru a cada calabre”.

Durante la llucha pol control de Grozni diéronse 3 grandes batalles, dos d’elles cola participación de l’aviación y l’artillería ruses, qu’estrozaron la mayoría de la ciudá.

Nun hai estadístiques oficiales sobre cuánta xente morrió durante los 11 años de conflictu en Chechenia, qu’entamó cuando les tropes ruses intentaron desaniciar un llevantamientu separatista en 1994.

Los espertos en Derechos Humanos calculen que morrieron, como mínimo, unos 100.000 civiles, d’un total d’un millón d’habitantes. Sigún los militares morrieron unos 10.000 soldaos rusos, anque activistes independientes polos Derechos Humanos creen que la cifra real ye polo menos dos veces mayor.

Éstos activistes tienen conocencia d’unes 60 foses comunes en Chechenia, anque la su exhumación y la identificación de los cuerpos topen siempres con munchos problemes.

Esbilla | del.icio.us

Dexar un comentariu