Conceyu Asturianu de Solidaridá con Chechenia

Vyacheslav Feraposkhin, Caucasian Knot

Activistes de derechos humanos desixen-y al Estáu espaol que “nun-y prive a Gasaev del últimu abellugu”. Esti ye’l títulu del comunicáu conxuntu que les organizaciones MAShR, Comité Chechenu de Salvación Nacional y el Comité p’Asuntos de los Migrantes Forzosos asoleyaron sobre’l casu de Murad Gasaev.

El 24 Marzu fízose pública la decisión d’un tribunal español d’estraditar a Murad Gasaev, nacíu en 1974, a Rusia polos cargos que-y imputen les fuercies de seguridá de la Federación Rusa de participar nun ataque lleváu a cabu nel branu de 2004 por fuercies armaes illegales contra les fuercies de seguridá d’Inguxetia.

Gasaev puede ser deportáu a Rusia nunes dos selmanes dempués de l’aprebación del veredictu del tribunal por una comisión especial del Gobiernu español, que yá-y indicó a la Oficina del Fiscal d’Inguxetia que “ye un meru formalismu, nun tengan duldes de que la su solicitú va ser satisfecha”.

Los activistes de derechos humanos creen que Murad Gasaev foi “calumináu por Idris Matiev, como munchos otros mozos, de los que dellos morrieron yá”. Nesti sen, los firmantes del comunicáu faen alcordanza de Khasbulat Amirkhanov y Adam Gorchkhanov. El testu del comunicáu de los activistes de derechos humanos puede atopase nel web www.ingushetia.ru.

Inguxes residentes n’Alemaña piden-y al Estáu español que nun estradite a Gasaev

Per otru lláu, el pasáu sábadu tuvo llugar una concentración en Frankfurt am Main pa desixi-y a les autoridaes españoles que nun deporten a Murad Gasaev a Rusia. Inguxes residentes en diferentes localidaes alemanes participaron nesta concentración.

Sigún pudo saber Caucasian Knot, representantes del consuláu español acercáronse a los manifestantes, y-yos entrugaron cuála yera la razón de la protesta y por qué los sus cartelos teníen que ver col Estáu español. Los inguxes que taben presentes na protesta desplicaron la situación de Murad Gasaev y pidieron-y al cónsul que los ayudare.

El secretariu del cónsul garró una carta, escrita en castellán, de los manifestantes na que-y faen una petición a Javier Ignacio Martínez del Barrio, Cónsul Xeneral del Estáu español en Frankfurt am Main, y xusto de pasar pol rexistru, dexáronla na oficina’l Cónsul.

Amás, los inguxes residentes n’Alemaña mandaron dos cartes más, con acuse de recibu, al Rei d’España Juan Carlos I y al Embaxador Plenipotenciariu del Estáu español n’Alemaña, Gabriel Biscuez Aparicio.

Una traductora española, que tornó al castellán estes cartes y el llamáu de Magomed Mutsolgov, líder de la organización de derechos humanos Mashr, al embaxador español en Moscú, asina como los xefes dela imprenta onde se ficieron los cartelos d’esta concentración, refugaron cobrar polos sus servicios, aduciendo que comprendíen perbién la situación na que s’atopaba el propiu Murad Gasaev.

Esbilla | del.icio.us

Dexar un comentariu