Conceyu Asturianu de Solidaridá con Chechenia

El 21 de marzu, el presidente’l Comité Chechenu de Salvación Nacional, Ruslán Badalov, asoleyó una declaración na qu’espresaba la su protesta pola posible estradición de Murat Gasaev del Estáu español a Rusia. Sigún la información espublizada nos medios de comunicación, Gasaev foi deteníu nel Estáu español n’Avientu de 2006, siguiendo la solicitú de la Fiscalía Xeneral rusa, que lu acusa de participar en dellos atentaos terroristes en Rusia.

“Conozo a Murat Gasaev dende que yera nenu, vílu crecer. Fuí presidente’l Comité de deportes de la república Checheno-Ingushetia, y por eso conocía y tenía una gran amistá col pá de Murat, Ahmet Gasaev, Entrenaor Eméritu de la Federación rusa. Por cierto, Murat ye amás un gran deportista, y tién el títulu de Mayestru de Deportes en llucha grecorromana.

Quiero destacar que Murat Gasaev nun participó n’actos militares nin terroristes en dengún de los bandos; nun esiste preba denguna de que tea venceyáu a un grupu armáu terrorista nel Cáucasu Norte. Pero foi víctima d’una falsa denuncia y tuvo que buscar abellugu lloñe de Rusia, n’Europa, onde busquen proteición tantos paisanos suyos, fuxendo de les inxusticies y la impunidá de les llamaes estructures responsables de facer cumplir la llei nel su país natal.

Un ciudadanu rusu imaxina a Europa como una entidá na qu’esisten les mesmes normes en materia d’asilu y proteición de los derechos civiles, na que reinen los mesmos valores. Pero pa Murat Gasaev, Europa dexó de ser lo que él creyía que yera, cuando esperaba alcontrar asilu y proteición nun Estáu europeu.

Resulta que l’Estáu español tién la su propia visión, daqué diferente de la de los demás Estaos d’Europa, sobre lo que son los principios europeos, y en xeneral occidentales, de la democracia y la proteición de los derechos humanos. Ye la única forma de desplicar la decisión d’esi Estáu de “pidir información” a la Fiscalía rusa, el muérganu represor del que precisamente fuxía la víctima, sobre si se-y tenía o non que conceder l’asilu.

Ye un fechu indignante, tratándose d’un Estáu que representa la cultura y democracia europees. Les organizaciones de derechos humanos, lo mesmo ruses qu’internacionales, tán esmolecíes polo acontecío y temen que Murat Gasaev pueda ser estraditáu a Rusia, onde-y espera una muerte terrible, yá que nes cárceles ruses proliferen los malos tratos y les tortures, prohibíos en tol mundiu civilizáu.

El Comité Chechenu de Salvación Nacional quier xunir la su voz a les firmes protestes contra la posible denegación d’asilu pa Murat Gasaev pela parte del Estáu español y la su consiguiente entrega a les autoridaes ruses. Consideramos que si l’Estáu español-y deniega l’amparu, Murat Gasaev habrá beneficiase del derechu d’elexir a otru Estáu europeu, onde pueda alcontrar abellugu.”

Esbilla | del.icio.us

Dexar un comentariu