Conceyu Asturianu de Solidaridá con Chechenia

Itar-Tass

L’españíu d’una mina na rexón chechena d’Urus-Martan causó feríes a un mozu de 18 años, sigún informó una fonte del Ministeriu chechenu del Interior a Itar-Tass.

L’adolescente taba recoyendo puerros silvestres cuando españó la mina, que-y causó feríes na pierna.

Sigún la Oficina chechena del Ombdusman de Derechos Humanos, les mines y les bombes ensin detonar firieron yá a más de 3.000 persones, 574 d’elles muyeres (de les que morrieron 100), 2.494 homes (604 muertos) y 754 neños y neñes (131 muertos/es).

Les autoridaes de la república asoleyaron el pasáu febreru informes de les alministraciones de distritu qu’afirmen que Chechenia necesita facer trabayos de desmináu en 24.500 hectárees (245 km2). El desmináu tendría un costu d’ente 500.000 y 600.000 rublos (ente 13.500 y 16.200 euros) por hectárea.

Amás, tán preparándose más documentos rellacionaos con esti tema, que van presentase en prósimes feches al Comité de Seguridá de la Duma Estatal.

L’añu pasáu los zapadores del Ministeriu de Defensa desactivaron unes 30.000 municiones en Chechenia. El plan pal presente añu va ser tamén estensu, sigún afirmó a primeros d’añu Nikolai Serdtsev, Xeneral de la Fuercia d’Inxenieros.

“Vamos desminar 1.000 hectárees. El períodu de cumplimientu d’esta misión dependerá de les fuercies y los fondos asignaos”, aseguró. “Por exemplu, un únicu batallón podría tardar delles docenes d’años en desminar, siguiendo los estándares internacionales, les tierres de pastu y les de cultivu”.

Esbilla | del.icio.us

Dexar un comentariu