Conceyu Asturianu de Solidaridá con Chechenia

Muslim Ibragimov, pa Caucasian Knot

Nun queden yá Puntos de Residencia Temporal (PRT) pa desplazaos internos nel territoriu de la República de Chechenia. Dende esti momentu los PRT’s tienen la denominación oficial de “dormitorios” y les persones que viven nellos la de “persones que necesiten meyorar les sus condiciones de vida”.

Asina-y lo fizo saber a un corresponsal de Caucasian Knot un trabayador d’una de les organizaciones non gubernamentales locales. La lliquidación formal de los PRT’s podría causar la paralización de l’ayuda humanitaria a les persones que viven nellos.

“… o quizás seyan desaloxaes de les instalaciones qu’ocupen por delles razones de calter puramente formal”, afirma. “Amás, la xente que vive nos “dormitorios” va tener que pagar por servicios como’l suministru d’agua, lluz y gas, y munchos d’ellos cenciellamente nun van poder pagar porque lo perdieron too como resultáu de la guerra”.

Miembros del Serviciu de Migración de la república refugaron facer cualesquier comentariu sobre esti asuntu. Nun pudieron contestar a la cuestión de cómo la pérdida del su estatus oficial puede afectar a la situación de los desplazaos internos.

Con anterioridá’l Presidente chechenu Ramzan Kadyrov afirmara que, a finales del presente añu, toles families que perdieron les sus viviendes nel cursu de la guerra diben ser reubicaes. Conózse’l datu de que fai bien poco había, sólo na ciudá de Grozni, unes 350 families de desplazaos internos que vivíen nestos TRP’s.

Esbilla | del.icio.us

Dexar un comentariu