Conceyu Asturianu de Solidaridá con Chechenia

Por Brian Whitmore, pa RFE/RL

Una nueva llei propón un control más estrictu del Estáu sobre les webes de noticies ruses. Otra restrinxe la propiedá foránea sobre los servidores d’Internet. Y un nuevu decretu del Gobiernu obliga a éstos servidores a permitir a les autoridaes pa que puedan lleer los correos lletrónicos de los sus clientes.

Mientres crecía la censura sobre los medios tradicionales durante la presidencia de Vladimir Putin, Internet convirtióse rápidamente nun bastión de la disidencia y la llibertá d’espresión ente los rusos. Colos sus animaos blogs y chats, l’Internet rusu convirtióse nel equivalente del sieglu 21 de la silenciosa mesa de cocina de discusión política de la era soviética.

¿Tán los burócrates y censores del Gobiernu preparando l’afogamientu d’esti últimu oasis de llibertá de prensa?

Sigún Oleg Panfilov, abogáu de la prensa llibre qu’encabeza el Centru de Periodismu en Situaciones Estremes, que tién la su sede en Moscú, les autoridaes ruses lleven años esmolecíes pola creciente importancia d’Internet.

“Tienen miéu. Esti miéu a Internet xurdió fae unos cuatro años, cuando’l Kremlin vió cómo esti mediu se convirtió na principal fonte d’información durante la Revolución Naranxa”, afirma Panfilov, que tién él mesmu un popular blog nel web “LiveJournal”.

Compradores n’alerta

Un decretu del Ministeriu de les Tecnoloxíes de la Información y les Comunicaciones, asoleyáu’l pasáu 26 de Febreru, desixe a toles compañíes de telecomunicaciones y los servidores d’Internet a permitir al Serviciu Federal de Seguridá (FSB) a controlar ensin restricciones toles comunicaciones, yá sean llames de teléfonu, mensaxes de testu o correos lletrónicos.

Los servidores d’Internet y les compañíes de telecomunicaciones tán obligaes tamién a instalar, corriendo ellos colos gastos, equipamientos que permitan al FSB controlar les comunicaciones en cualesquier momentu, ensin el conocimientu del servidor nin del usuariu. Esti equipamientu cuesta unos 100.000 dólares (63.300 euros). El decretu tá rellacionáu con un programa llamáu SORM-2, entamáu en 1998 col fin de permitir al FSB controlar l’Internet.

Per otru lláu, tá preparándose nel Parllamentu una nueva llei sobre trabayos d’investigación que podría prohibir a los estranxeros mercar la mayoría de les aiciones d’un servidor d’Internet ensin un permisu espresu del Gobiernu.

Persones con información privilexada afirmen qu’esta llexislación tién una fuerte oposición dientro de la industria. “Nun creo que seya mui realista aprobar esta llei, porque hai un lobby mui fuerte na su contra. Hai yá un montonáu de compañíes con un altu índiz d’accionistes estranxeros”, narra al serviciu rusu de RFE/RL Alexander Militsky, que tién una web que monitorea servidores d’Internet.

Mientres la televisión controlada pol Estáu y la mayoría de los medios escritos siguen dilixentemente la llínia gubernamental con una completa cobertura de Putin y el su sucesor electu, Dimitri Medvedev, blogs como “LiveJournal” y sitios web de noticies como newsru.com son críticos, animaos ya inreverentes.

Robert Amsterdam, ún de los abogaos del equipu de defensa internacional del magnate de YUKOS encarceláu Mikhail Khodorkovsky y autor d’un influyente blog sobre temes rusos, afirma que la emerxente tendencia hacia un mayor control pela parte del Estáu espeya una enraigonada visión pela parte del Kremlin de que controlar los medios ye un aspectu fundamental pa defender la seguridá nacional.

“Too ello va nuna dirección”, afirma Amsterdam sobre la emerxente estratexa del Kremlin. “Una de les coses que creo que naide de nós entiende bien ye la midía na que los rusos ven esto como parte de la su seguridá, la bursatilización de los medios. Y esto vién too d’una completa visión de los medios de comunicación llibres como dalgo asina como una menacia a la seguridá. La mi opinión ye que últimamente tán asaltando d‘Internet y que van continuar faciéndolo baxo la presidencia de Medvedev. Polo menos eso ye lo que paez”.

Periodismu “responsable”

En Marzu Putin creó una nueva axencia federal pa regular los medios ya Internet y pa supervisar los sus conteníos. Un mes dempués, les autoridaes usaron vacíos llegales pa cerrar la espublización online siberiana “Novy Fokus” por nun cumplir col requisitu de rexistrase como organización de noticies, pesie al fechu de que la llei rusa nun requier esplícitamente a los sitios web de noticies que se rexistren.

Vladimir Slutsker, miembru del Conseyu de la Federación, la cámara alta del Parllamentu rusu, tá intentando crear un rexistru obligatoriu. Slutsker declaró recientemente al diariu Kommersant que dicha llexislación ye necesaria pa disuadir a los “periodistes inresponsables d’espardir rumore y escondese detrás de sitios web anónimos”.

Dempués de qu’un sititu web ficiere públicos rumores que rellacionaben a Slutsker y a la su muyer con actividaes criminales, ésti introduxo una llei que desixía a tolos sitios web que tuvieren más de 1.000 visites al día que se rexistraren énte’l Gobiernu como mediu de difusión. Si’l proyectu de Slutsker pasa a ser llei, pa los sitios web de noticies y los blogs más populares de Rusia podría ser necesario solicitar la llicencia y ser oxetu de les mesmes regulaciones que los medios audiovisuales y escritos.

Los analistes califiquen el proyectu de Slutsker de nada prácticu pol inmensu númberu de sitios web y la dificultá de chequealos toos, y añaden que’l día que les autoridaes puedan controlar realmente Internet tá mui lloñe tovía.

“Esti intentu de rexistrar los sitios web como medios de comunicación ye estúpidu”, afirma Panfilov. “Cenciellamente nun ye posible. Ye namái que’l deséu d’un par de diputaos, pero nun va ocurrir. Imaxina, ¿cómo vas rexistrar un blog? Amás, tolos medidores de siguimientu de tráficu web en Rusia apurren informaciones diferentes.

Panfilov añade qu’un sistema asemeyáu al qu’esiste en China, onde l’Estáu controla Internet y bloquea sitios web que considera subversivos, nun ye posible anguañu en Rusia. Destaca que, al contrariu qu’en China, la mayoría de los servidores d’Internet rusos son de propiedá privada y más difíciles de controlar.

“Necesitaríen habelo fecho fai 10 años”, diz Panfilov. “Entos podríen controlalo. Agora ye prácticamente imposible. Agora hai xente abondo que sabe cómo usar los servidores d’un satélite, cómo tener accesu a internet al traviés de comunicaciones de móviles, saben abondo. Y aisllar Rusia d’Internet nun ye posible”.

¿Firewalls enormes?

Dalgunos observadores rusos afirmen que’l Kremlin nun tá interesáu en controles al estilu chinu. Amsterdam apunta que la estratexa de control de los medios rusos –que repercute sobre los periódicos de la oposición como Novaya Gazeta y emisores de radio como Ekho Moskvy”- ye más sofisticada.

“Tás perdiendo’l norte si nun crees qu’ellos pueden controlar esto”, afirma Amsterdam. “Lo que tenemos qu’entender ye qu’ellos nun tán intentándolo, y que nun tienen el control al 100%. Una de les coses que demuestra la supervivencia de Novaya Gazeta y Ekho Moskvy ye que los lliberales tán encantaos de falar con lliberales. Nun quieren a lliberales falando con cualesquiera otru”.

Amsterdam añade qu’una combinación d’intimidación, l’usu selectivu de lleis aleatories, la cooptación y otros medios fueron mui efectivos pa controlar los medios escritos y audiovisuales.

Y hai indicios de qu’estos mecanismos yá probaos pueden usalos tamién les autoridaes nel contestu de los medios modernos.

Les acusaciones recientes contra’l blogger Savva Terentyev por, supuestamente, “incitar al odiu” contra axentes de policía al mediante los sus posts en LiveJournal sirven como exemplu. Terentyev enfréntase a una posible multa de 4.000 dólares (unos 2.500 euros) o a una conderga de dos años de cárcel.

“L’ataque contra Internet puede ser un sutil ataque creciente”, asegura Amsterdam. “Hai que ser claros, ye multidimensional. Mira lo que tán faciendola cola prensa habitual. Mira lo que ficieron cola televisión. Tán teniendo tantu éxitu con una mezcla de cooptación, cola compra d’aiciones por parte de los sus ricos collacios, con una intimidación cada vez mayor d’autocensura que-yos tá resultando perbien, que probablemente camienten que nun tán na necesidá de controlalo too dafechu”.

Esbilla | del.icio.us

Dexar un comentariu