Conceyu Asturianu de Solidaridá con Chechenia

Por Andrei Smirnov, pa Chechnya Weekly

Dalgunes persones afirmen que’l líder pro-rusu de Chechenia, Ramzan Kadyrov, controla con firmeza la república y nun tién rivales, polo menos nel bandu chechenu pro-rusu. Por embargu, los conflictos secretos dientro d’esti bandu salen a la lluz de cuandu en cuandu, demostrando que Kadyrov tovía tién competidores en Chechenia.

A finales de 2006 Movladi Baisarov, comandante del escuadrón Gorets (“montañés” en rusu) controláu pol Serviciu Federal de Seguridá (FSB), foi asesináu en Moscú por un axente de Kadyrov. Alredor d’una selmana antes del su asesinatu, Baisarov concedió una entrevista a Moscow News na que criticaba a Kadyrov y fizo mención de dalgunos de los crímenes cometíos polos homes de Kadyrov contra civiles chechenos. El presidente chechenu fue quién, a quitar del medio a Baisarov dempués de que l’asesín de Baisarov fuera sancionáu pol FSB. Los dirixentes del FSB consideraron que Baisarov falara demasiao, y el kontora (nome non-oficial pal FSB en Rusia) yá nun lu necesitaba más.

Por embargu, a Kadyrov nun-y valió namás con eliminar a Baisarov. Entamó una campaña en Rusia contra Akhmed Khasambekov, cabezaleru de la Oficina d’Investigación en Chechenia del Ministeriu del Interior rusu (ORB-2). Ramzan Kadyrov acusó al ORB-2 de toles violaciones contra los derechos humanos cometíes poles axencies de seguridá en Chechenia.

En Xunetu de 2007 Kadyrov forzó a les autoridaes ruses a reemplazar a Khasambekov por un oficial de policía chechenu lleal a Ramzan. Por embargu, Akhmed Khasambekov consiguió’l puestu de Vice-director de la Dirección Principal del Ministeriu del Interior nel Distritu Federal Sur, polo que tovía tién capacidá pa controlar les entidaes qu’encabeza.

Dempués del asesinatu de Movladi Baisarov y la marcha de Khasambekov, llegó la hora de los hermanos Yamadaev. Ruslan Yamadaev ye anguañu diputáu na Duma estatal, y Sulim Yamadaev ye comandante del batallón Vostok, que tá controláu pola intelixencia militar rusa (GRU). El batallón forma parte tamién del 42º destacamentu del Exércitu rusu, estacionáu en Chechenia.

Kadyrov tá usando contra los hermanos Yamadaev les mesmes táctiques que yá usó contra Baisarov y Akhmed Khasambekov. Ramzan apunta al batallón Vostok como xunidá responsable de toles violaciones a los derechos humanos na rexón.

El 26 de Febreru Ramzan Kadyrov mantuvo un alcuentru en Grozni, la capital chechena, nel que se faló del procesu de reconstrucción nel distritu de Vedeno, ún de los sitios más “calientes” na república. El diputáu de la Duma estatal Adam Demilkhanov, un esbirru de Kadyrov, y Ruslan Alkhanov, Ministru del Interior de Chechenia, falaron-y a Kadyrov sobre’l su reciente viaxe a Vedeno. Demilkhanov afirmó que los habitantes de Vedeno sofitaben dafechu les polítiques del presidente chechenu. Sigún Demilkhanov, incluso los familiares de los rebeldes sofiten a Ramzan y conderguen a los guerrilleros. Al mesmu tiempu, los habitantes del distritu denuncien los abusos cometíos por miembros del batallón Vostok y desixen a les autoridaes la retirada d’esta xunidá de Vedeno. Kadyrov aseguró que “si cualquiera oprime a los nuesos civiles, debemos considerar toles denuncies” (Grozny-Info, 26 de Febreru).

Dempués d’esti alcuentru, Demilkhanov acudió a una emisora de TV local, onde fue más duru col Vostok: “el batallón Vostok ye responsable de munchos crímenes contra civiles”, afirmó. “La xente quéxase y pide que se desfaiga’l batallón. “Ellos (los miembros del batallón) sólo traxeron desgracies a esi distritu (Vedeno) y a tola república. Nun son d’utilidá. Hai que desanicialos” (Forum.msk.ru, 29 de Febreru).

Asina entamó una campaña de crítiques contra’l Vostok. Nuna entrevista a la televisión chechena’l pasáu 5 de Marzu Moagomed Khambiev, un antiguu líder guerrilleru qu’anguañu ye un fiel aliáu de Ramzan Kadyrov, citó al Vostok como una de les principales razones poles que los mozos chechenos siguen incorporándose a la insurxencia. “Nun hai dulda de que’l batallón Vostok ye una fonte de disconformidá pa la nuesa mocedá”, afirmó Khambiev. “Los sus miembros detienen a tola xente que quieren y golpéenla. Por supuesto, hai buenos guerreros nesi batallón, pero la mayoría de los miembros de la xunidá son drogadictos qu’asesinen xente ya ignoren les nueses tradiciones y toles lleis humanes. El batallón Vostok, encabezáu por Sulim Yamadaev, comete graves delitos” (Regnum, 5 de Marzu).

Ye de destacar que Khambiev llamare a los miembros del Vostok drogadictos. En 2006, Adam Demilkhanov afirmó a Moscow New que Movladi Baisarov consumía heroína. Dellos díes dempués de la espublización d’aquella entrevista, el propiu Demilkhanov disparó a Baisarov nel centru de Moscú.

El 4 de Marzu Ramzan Kadyrov designó al Viceministru del Interior chechenu, Shemil Magomaev, como nuevu cabezaleru del Distritu de Vedeno. Kadyrov tá intentando demostrar por tolos medios al Kremlin que él, al contrariu que Yamadaev, puede controlar el focu de la insurxencia chechena.

Col oxetivu de debilitar les posiciones de los Yamadaev, Kadyrov aconceyó’l 19 de Febreru con un aliáu de los hermanos en Chechenia, Said-Magomed Kakiev, comandante del batallón Zapad (Oeste) y vicecomandante militar de la república. Kadyrov prometió más sofitu económicu a Kakiev y los sus homes. Por embargu, d’alcuerdu al web rebelde Kavkaz-Center, Kakiev, qué tá al tantu dafechu de los planes de Ramzan pa elliminar el Vostok, nun quier tar tan cercanu al presidente chechenu. Kakiev camienta que si Kadyrov ye quién a desmantelar el Vostok, el Zapad sedrá’l prósimu.

Al mesmu tiempu, Ramzan Kadyrov tá intentanto garrar el control de rexistru militar rexonal y de les oficines d’allistamientu. El Vostok y el Zapad recluten nuevos miembros al traviés d’estes oficines, polo que’l su control sinifica controlar el reclutamientu pa los batallones. A finales del añu pasáu Kadyrov aconceyó con Said Selim Tsuev, comisariu militar de Chechenia, al que prometió “un sofitu total” a les oficines d’allistamientu en Chechenia (Grozny-Info, 25 d’Avientu de 2007).

La rempuesta a la cuestión de si Kadyrov podrá ganar la su batalla contra los hermanos Yamadaev depende totalmente del Kremlin y del mandu militar rusu. El Vostok xuega un papel crucial nes táctiques ruses d’anti-insurxencia en Chechenia, polo que nun ye una decisión fácil permitir a Ramzan aniquilar esti batallón. Por embargu, paez que’l Kremlin tá interesáu en qu’haiga namás un dictador pro-rusu na rexón, polo que les consideraciones polítiques prevalecerán sobre les militares.

Esbilla | del.icio.us

Dexar un comentariu