EL “NEGOCIU SANITARIU” EN CHECHENIA
Por Ramzan Akhmadov, pa Prague Watchdog
Pa consiguir recibir tratamientu nos hospitales de Chechenia los pacientes necesiten, penriba de tolo demás, tener perres. Nin la esistencia d’un seguru mélicu obligatoriu, nin la discapacidá nin denguna otra circunstancia-yos salven de tener qu’apurrir a los doctores un incentivu económicu.
“Fai un par de selmanes la mi sobrina, que tién 20 años, taba nel Hospital central de maternidá. Falóme de les práctiques que se facíen allí”, afirma Birlant Matsayeva, una vecina de Grozni de 44 años d’edá. “Tuvo que paga-yos a les comadrones 500 rublos (unos 13,5 euros). Y tola xente camienta que ye una cantidá bastante razonable, yá que otres muyeres embarazaes tuvieron que pagar 3.000 rublos (unos 81,5 euros)”.
“Y nun sólo eso, sinon que por cada preba que tuvo que facer tuvo que pagar 100 rublos (unos 2,7 euros). Pagó poles inyecciones, poles pastielles y por otros medicamenteos. Cuando dio a lluz la su familia pagó-y a la comadrona 500 rublos (13,5 euros). Estes son el tipu de “tases” que tienes que pagar equí. L’Hospital central de maternidá de Grozni lleva’l nome d’Aymani Kadyrova (la madre del Presidente de la República, Ramzan Kadyrov), y la República lu surte con tolos medios necesarios, incluyíos altos salarios pal personal mélicu. Antes se-yos alvertía a los pacientes de que nun ficieren pagos a nadie, pero’l sistema de sobornos continúa esistiendo equí de les más diverses formes. Amás, esti problema afecta tamién a otres instituciones sanitaries de la República”, asegura Birlant.
Los pacientes de los hospitales chechenos tamién denuncien que cuando entren nestes instalaciones tienen que llevar con ellos tola ropa de cama, dende los colchones o mantes a otres pieces de cama.
Amás de les instituciones sanitaries del Estáu, en Chechenia hai tamién un númberu curiosu d’hospitales privaos. Diferénciense de los estatales namái nel fechu de que los doctores qu’exerciten n’ellos lleven de los pacientes munches más perres.
“Tuve dalgunos problemes de salú, y al nun tener yo muncha fe nos mélicos de los nuesos hospitales, decidí acudir a los facultativos privaos. Hai una clínica privada en Grozni llamada Zdorovye (Salú). Bien, fui a ver a un urólogu pa desplica-y el mi problema. Atendióme y mandóme de la mesma a facer un scanner d’ultrasoníos”, afirma Sultan Azniyev, de 33 años d’edá. “Tuve que pagar 200 rublos (unos 5,4 euros) pola consulta, y otros 300 (8,1 euros) pol scanner. Tuve que faceme tamién otres prebes, que me costaron 100 rublos (2,7 euros).
“Volví a ver al doctor colos resultaos del scanner. Mírolos y díxome que tenía próstata. Desplicóme que ye una enfermedá mui complexa que necesita un tratamientu llargu. Dempués entrugóme si quería entamar el tratamientu. Al recibir una rempuesta afirmativa pela mio parte, díxome que diba costame 2.300 rublos (unos 62,5 euros). Dempués de garrar les perres, escribióme una receta que llevé a la farmacia. Nella pagué 1.500 rublos (40,7 euros) por una medicación que tenía que tomar durante un mes”, relata Sultan. Y añade, “un mes más tarde, volví a ver al doctor. Tuvo cinco minutos entrugándome pol mi estáu de salú y dempués fízome otra recete. Otra vez pa un mes. Tuve que volver a la farmacia y pagar otros 2.000 euros (54,3 euros) pola medicación. Fice’l tratamientu enteru, pero la mi salú nun meyoró. Al mandame estes dos recetes, el “doctor” llevóme más de 2.000 rublos (54,3 euros)”, afirma l’home.
En Chechenia hai farmacies privaes al lláu casi de tolos hospitales.
Los habitantes locales desixen que les melecines que provienen del Ministeriu de Saindá habríen ser de baldre pa los pacientes. Amás, los doctores recomienden davezu a los sos pacientes que merquen la su medicación na farmacia onde estos doctores tienen al su “minorista”, aduciendo que sólo neses farmacies pueden conseguir les melecines que son xenuines y non falsificaes.
“Nun soi quién a entender por qué oficialmente considérase que les melecines son de baldre si los pacientes tenemos que pagar a cada pasu que damos pa conseguiles”, afirma con rabia Rosa Makhmudov. “Tengo un fíu de 3 meses y tengo que dir a la clínica pa facer chequeos y otros tratamientos regularmente. Por cada consulta tengo que paga-y al pediatra 100 rublos (2,7 euros). Los otros mélicos cobren lo mesmo. Y esto pasa nuna clínica pública, onde los mélicos tienen un salariu y otros pluses afitaos. Llegó a los mis oyíos que los doctores anden quexándose constantemente de que los sus salarios son perbaxos. Pienso que son unos sinvergüences y caradures dafechu. Sólo tán interesaos nes perres. ¿Ónde tá’l su “xuramentu hipocráticu”.
Esbilla
del.icio.us
Nun hai comentarios »