Conceyu Asturianu de Solidaridá con Chechenia

Caucasian Knot
La organización pública “Voz de Beslán” tá cambiando’l so nome a “Voz de Beslán”-Organización Pública de toa Rusia de Víctimes d’Actos Terroristes. Los miembros del Comité tán seguros qu’una organización pública d’esta triba ensin rexistru ye posible baxo l’artículu 3 de la Llei Federal d’Asociaciones Públiques.

“De xuru que nun vamos ser inscritos nel rexistru, yá que baxo l’actual falta de llegalidá y el control dafechu sobre los disidentes, el rexistru d’una organización pública fáese cola arbitrariedá de les autoridaes, y ye una mena de silenciar la llibertá d’una asociación de voluntarios” afirma’l comunicáu de “Voz de Beslán”.

El Comité va siguir coles sos actividaes colos sus antiguos miembros, y encabezáu pola su presidenta, E.L. Tagaeva-Betrozova, y la su Co-Presidenta, E.L. Kesaeva.

“Tamos infinitamente agradeciós a tol mundiu, incluyíos conocíos activistes de los Derechos Humanos del nuesu país, que nos sofitaron y espresaron una sincera solidaridá con nós, víctimes de la traxedia de Beslán”, escriben los miembros de “Voz de Beslán” nel su comunicáu.

Créase’l Conseyu d’Evaluación de la traxedia de Beslán n’Osetia del Norte

Per otru lláu, el pasáu 5 de Febreru la organización pública “Styr Nykhas” aconceyó n’Osetia del Norte colos Comités “Voz de Beslán” y “Madres de Beslán”, aconceyamientu nel que se llegó al determín de fundar el Conseyu d’evaluación de la investigación de la traxedia de Beslán.

La iniciativa pa crear esti organismu salió de les propies víctimes, que cuenta col sofitu del Conseyu d’Ancianos de “Styr Nykhas”, saliendo aprebáu l’organigrama del Conseyu d’evaluación d’esti primer aconceyamientu.

Stanislav Kesaev, Vicepresidente del Parllamentu d’Osetia del Norte, foi designáu como Presidente d’esta nueva estructura, cuyos miembros son 5 persones de la organización pública “Styr Nykhas”, Susanna Dudieva, cabezalera de la organización “Madres de Beslán”, y Ella Kesaeva, Co-Presidenta de “Voz de Beslán”. Con estes persones, el Conseyu habrá d’evaluar el cursu de la investigación del actu terrorista en Beslán.

El prósimu aconceyamientu de “Styr Nykhas” tendrá llugar en Marzu. Pa esa fecha, sigún Ella Kesaeva, el Conseyu presentará dalgunos resultaos del su trabayu.

Les organizaciones aconceyaes asoleyaron tamién un comunicáu nel qu’afirmen que tan pronto como lleguen los materiales del casu sobre’l reconocimientu de los estatutos de la organización provoquen l’apertura d’un procesu xudicial por “estremismu” en cualquier instancia d’Osetia del Norte, la organización “Styr Nykhas” pidirá’l cierre d’esi casu.

Creación del proyectu “Observatoriu” en sofitu a “Voz de Beslán”
Esi mesmu 5 de Febreru, el proyectu xunitariu llamáu “Observatoriu”, formáu pola Organización de Llucha contra la Tortura, de Xinebra, y la Federación de Derechos Humanos, de París, condergaron la presión llegal exercía sobre la organización “Voz de Beslán”. Asina lo aseguró Oksana Chelysehva, cabezalera de la Fundación de Sofitu a la Tolerancia, con sede en Nizhniy Novgorod.

L’”Observatoriu” fizo un llamáu a les organizaciones internacionales pa qu’intercedan nel conflictu esistente ente la organización creada polos familiares de Beslán y les autoridaes ruses. Los activistes de los Derechos Humanos tán esmolecíos col fechu de que les sanciones llegales contra la organización nel su conxuntu, y contra los sus miembros a nivel individual, tán dirixíes a restrinxir la su actividá.

Asinamesmo, l’”Observatoriu” remarcó que les actividaes de “Voz de Beslán” tuvieron siempre dirixíes namái que a consiguir xusticia en rellación a les víctimes de la traxedia de Beslán, informó’l web Sobkor.ru.

Los activistes de los Derechos Humanos piden-yos a les autoridaes de Rusia que garanticen la seguridá física y sicolóxica d’Ella Kesaeva, Co-Presidenta de “Voz de Beslán” y d’otros miembros de la organización, asina como d’aquellos que faen un trabayu de collaboración con esta organización. Amás, l’”Observatoriu” desixó tamién el cese de les aiciones llegales contra la organización y el procesamientu d’organizaciones de Derechos Humanos en Rusia.

Esbilla | del.icio.us

Dexar un comentariu