INTENTEN ILLEGALIZAR LES ONG CHECHENES
Umalt Chadayev, pa Prague Watchdog
La delegación en Chechenia del Serviciu Federal del Rexistru rusu tá intentando la illegalización de la Xunión d’Organizaciones Non Gubernamentales (XONG), un grupu que difunde información sobre la situación de los derechos humanos en Chechenia ya Inguxetia.
El grupu foi acusáu nun principiu de cometer inregularidaes alministratives, y a éstes acusaciones se-y añade agora la de “incitación al odiu étnicu”.
“Nos últimos meses la nuesa organización tá siendo oxetu de numberoses inspecciones de la Policía y funcionarios de tasación”, afirma Taisa Isayeva, directora del Centru d’Información de la XONG. “A estes inspecciones súmense a veces representantes de fuercies de seguridá del Distritu Federal Sur. Tamos convencíos que tá llevándose a cabu una campaña deliberada d’acosu a la nuesa organización, col oxetivu d’illegalizala con pretestos aparentemente respetables”.
Fai poques feches fízose una petición de llevar a cabu un “esamen llingüísticu” nuna espublización de la XONG de la pasada seronda. Alegábase que’l folletu, tituláu “Muyeres y neños. El derechu a la vida”, contenía llinguaxe qu’incitaba a la llucha inter-étnica. Con una tirada de 999 copies, el folletu contién testos en rusu ya inglés de figures públiques, artistes, defensores de los derechos y otres persones conocíes na República de Chechenia, y que traten de los asesinatos y masacres de muyeres y neños a cargu de soldaos federales rusos en Chechenia durante les dos recientes guerres. La presentación del folletu en Grozni cuntó cola presencia de miembros del Parllamentu chechenu, personal de la oficina del Comisariu chechenu pa los Derechos Humanos, y representantes de les ONG’s, qu’afalaron la espublización.
“Cola espublización d’esti folletu teníemos namái qu’un oxetivu: lo que pue llegar a facer la guerra, cualesquier guerra, a los pacíficos civiles. Creemos que ye moralmente indefendible intentar xustificar una guerra, qu’acarreta dolor, pena, sangre y llárimes a cientos de miles de persones. La guerra ye dende un entamu mala, y toles consecuencies provienen d’ehí”, afirma Taisa Isayeva.
“La prósima vista (nel Tribunal Supremu) tá programada pal 13 de Febreru. Sigún informaciones que consiguimos de fontes confindenciales, el tribunal tá baxo presión de miembros d’una axencia federal de seguridá, que tá desixendo la illegalización de la nuesa organización. Vamos intentar per tolos medios que se faiga xusticia”, conclúi Isayeva.
Nota de la Xunión d’Organizaciones Non Gubernamentales:
Nel folletu hai una alvertencia que, sigún la delegación en Chechenia del Serviciu Federal del Rexistru rusu, contién hestories qu’inciten al odiu étnicu:
Escribiéronse y cuntáronse yá hestories asgaya sobre la guerra nel territoriu de la República de Chechenia, que dura yá más de 12 años. Cientos de miles de ciudadanos muertos, tullidos y desapaecíos, ciudaes y pueblos destruyíos dafechu… esti ye’l cruel resultáu de dos campañes militares na República de Chechenia.
El nuesu boletín nun intentan facer denguna evaluación llegal o política de lo que pasó na República de Chechenia. Cenciellamente naguamos por informar a los nuesos llectores sobre’l dolor y la verdá de la xente que perdió a la xente que más quería: los neños, los hermanos, les hermanes, les esposes y familiares…
El mundiu enteru tuvo conocimientu de la traxedia de Samashki en 1995, sobre les atrocidaes de los militares nes localidaes d’Aldy, Kotar-Yurt, Alkhan-Yurt y Saadi-Kotar (Komsomolskoe) en 2000. El llanzamientu de cohetes sobre’l centru de la ciudá de Grozni n’Ochobre de 1999, nel que cientos de pacíficos ciudadanos resultaron muertos o feríos, los ataques armaos contra columnes de refuxaos nel iviernu d’esi mesmu añu y munches otres coses fueron bien conocíes nel mundiu. Tamién ye sabío que nel cursu de les actividaes militares la población civil, les muyeres, los ancianos y los neños son los más vulnerables.
Esti boletín contién hestories de xente de diferentes edaes, especialidaes ya intereses, representativos de la lliteratura. Ca ún d’ellos por separtao, pero al empar, perciben idénticamente la traxedia y el dolor de los demás. Comprenden la pena qu’afectó a les persones que son casi dafechu desconocíes pa ellos. La únca entruga que-y facemos a los nuesos entrevistaos yera qué casu ocurríu a muyeres y neños durante la guerra los impactara más fonderamente.
Ente estes hestories hai tamién hestories de xente común qu’esperimentó traxedies personales. Ye la hestoria d’un padre que perdió a dos fíes durante la primer campaña militar, y nel trescursu de la segunda perdió les sus tumbes. O la hestoria d’un esposu, cuya muyer, embarazada, foi violada y brutalmente asesinada, que lleva a cabu la so propia investigación de les circustancies de la violenta execución de la su muyer, y conocer los nomes de los sus asesinos.
Fuímos testigos de cómo los adultos, que tanto esperimentaron na so vida, sufrieron dos guerres, y agora, al contestar a esta cenciella entruga, sintiéronse preocupaos y nerviosos al mesmu tiempu. Paez que, al recordar esos fechos, volvieron inconscientemente a esperimentar el mesmu trauma que yá pasaren tiempu atrás.
Cada una d’estes hestories ye una hestoria completa que nos permite imaxinar la magnitú de lo que pasó equí nel trescursu de les aiciones militares, y retrucar a esta entruga: “¿A ónde nos lleven les guerres”, independientemente d’ónde se dean éstes.
El boletín pue lleese nel web de la Xunión d’Organizaciones Non Gubernamentales.
http://www.livechechnya.org/b/english.htm
Esbilla
del.icio.us
Nun hai comentarios »