AFONDA LA CRISIS N’INGUXETIA
Los observadores afirmen que la violencia na principal ciudá d’Inguxetia tá entrando nuna espiral fuera de control
Por Umalt Dudayev, en Nazran
El creciente enfrentamientu ente les autoridaes n?inguxetia y un nuevu movimientu d’oposición tá convirtiéndose en violentu y convirtiendo a esta República Autónoma na rexón más inestables del Cáucasu Norte.
La situación xiró a peor el 26 de Xineru dempués de que les fuercies de seguridá inrumpieron violentamente nuna marcha de la oposición na principal ciudá d’Inguxetia, Nazran, y se incendiaren dos edificios.
La oposición acusa al Presidente ingush, l’antiguu xeneral del FSB Murat Zyazikov, pol deterioru de la situación, mientres que les autoridaes defienden que ye la oposición la que tá alterando l’orden públicu.
“Baxo’l mi puntu de vista, lo que tá pasando anguañu n’Inguxetia demuestra que les autoridaes tienen pánicu”, afirmó al IWPR Aslambek Apayev, espertu del Grupu Helsinki Moscú en Nazran. “Creo que ye la razón que desplica l’usu de la fuercia contra los manifestantes el 26 de Xineru, y la persecución de líderes d’una protesta que tenía como oxetivu’l sofitu de Vladimir Putin y manifestase en contra de la fola de secuestros y asesinatos que vién asolando Inguxetia últimamente, y tamién contra la corrupción, que penetró yá en prácticamente toles esferes de la sociedá”.
Apayev aseguró que nos últimos años desapaecieron o fueron secuestraes n’Inguxetia más de 150 persones, munches d’elles ensin dengún vínculu cola militancia islámica, principal escusa de les autoridaes.
“Por exemplu, nel trescursu de sólo 3 díes, ente’ 30 de Xineru y el 1 de Febreru, 3 mozos fueron asesinaos poles fuercies de seguridá en Nazran o cerca d’ella: Jabrail Mutsolgov, de 24 años d’edá, Ramzan Nalgiev, de 23, y Yusup Chapanov, de 21 años. Los 3 fueron tiroteaos ensin alvertencia previa y dempués díxose que yeren guerrilleros (militantes islámicos)”, añade Apayev. “Obviamente, estos asesinatos estraxudiciales causaron gran indignación ente la población”.
Los organizacdores de la marcha del 26 de Xineru afirmaron que queríen falar con Zyazikov pa tratar sobre una serie de promeses y declaraciones qu’afirmen que son pura ficción.
“Queremos pidir (que Zyazikov) nos enseñe les fábriques que supuestamente diba construyir”, comenta nuna entrevista’l líder de la oposición Maksharip Aushev. “Los medios informaron de que él informó repetidamente al líder del país, Putin, de que taben construyéndose 70 u 80 fábriques y 3 millones de metros cúbicos de viviendes n’Inguxetia”.
El 25 de Xineru, el día antes de la marcha, les autoridaes anunciaron de sópitu una alerta por un inminente actu terrorista, y declararon una “zona d’operación anti-terrorista” nuna parte de Nazran, na capital ingush Magas, y nun distritu que llinda con Chechenia. Restrinxeron el movimientu de xente y mercancíes y les fuercies de seguridá teníen llibertá pa detener a cualesquier sospechosu.
Como rempuesta a esta situación, la xente mozo entamó a concentrase nes casi na Plaza del Alcuerdu de Nazran na mañana del 26 de Xineru. La plaza taba bloqueada por soldaos rusos y los OMON (cuerpu antidisturbios) inguxes. Sigún delles fontes, xuntáronse na plaza ente dellos cientos y 1.500 persones.
La violencia españó pronto ente los manifestantes y les fuercies de seguridá. Los primeros llanzaron piedres y cócteles Molotov, mientres los segundos pegaron tiros al aire y usaron gases llacrimóxenos y porres de goma contra los manifestantes. L’hotel más grande de la ciudá, l’Assa, y l’edificiu del periódicu pro-gubernamental Sardalo quedaron envueltos en llames, sufriendo ésti últimu graves daños.
Les autoridaes acusaron a los manifestantes d’entamar dambos incendios y d’atacar a la Policía.
“Dende l’entamu foi una protesta illegal”, narra a IWPR un oficial de policía ingush que un quier desvelar la so identidá. Asegura que los organizadores reclutaron a los participantes na protesta promentiéndo-yos “llotería caritativa de baldre” a precios baxos.
Ún de los líderes de la oposición, Magomed Yevloyev, afirmó al web NewTimes.ru que los incendios nun los entamaron los sos siguidores, sinon axentes provocadores. Añadió que “nós desenmascaremos a estos provocadores. Enterámonos de que la guardia personal del cabezaleru del Ministeriu del Interior, Musa Medov, tomó parte nos incendios provocaos nel edificiu de Sardalo y l’Hotel Assa. Pero tán intentando acusame a mí d’estos actos. Yo nun tuve nin na marcha. Nun fuí quién a llegar a Nazran esi día”.
Ente los deteníos taben dos conocíos activistes de los derechos humanos del grupu Memorial, Yekaterina Sokiranskaya y Tamerlan Akiev, y dellos periodistes, como’l vice-editor de la radio Ekho Moskvy, Vladimir Varfolomeyev, y el su colega Roman Plyusov. Dos periodistes, Said-Husein Tsarnayev y Mustafa Kurkiev, fueron acusaos de prende-y fueu al edificiu del periódicu y fueron golpeaos pola Policía. Casi tolos deteníos quedaron en llibertá esi mesmu día.
Apayev afirma que 201 persones fueron deteníes nes prosimidaes de la plaza, y que tovía queden 7 persones deteníes.
La mayoría de los inguxes vieron la escena con espantu. “Vivo nun edificiu de delles plantes cerca de la Plaza del Alcuerdu en Nazran, y ví como se comportaron los dos bandos, la Policía y la mocedá que taba allí aconceyada”, afirma una residente local, Khadi Sagova.
“Nun soi simpatizante de Zyazikov, pero puedo asegurar que l’actuación de la Policía foi provocada polos manifestantes. Cuando la Policía intentó que los manifestantes colaren de la plaza, éstos entamaron a llanzar piedres, palos y botelles de petróleu y aceite contra la Policía. Por supesto, la Policía prindólos rápido. Menos mal que nun morrió naide”.
Otru residente de la zona, Ruslan Tumgoyev, tién una mezcolanza de sentimientos asemeyada.
“Nun creo nin na decencia de Zyazikov nin nes intenciones pures de la nuesa oposición”, afirma. “Zyazikov algamó’l poder y agora tá esfrutando de los beneficios d’esta posición. La oposición tá intentando garrar el so sitiu o poner a una persona del su propiu entornu pa imponer les sus propies regles”.
Tumgoyev conclúi: “igual que muncha xente equí, toi mui esmolecíu porque los enfrentamientos ente les autoridaes y la oposición nun puedan llevar al caos y l’anarquía, y convertir a la nuesa república nuna segunda Chechenia”.
La oposición anunciara la so intención de llevar a cabu otra marcha de protesta’l 23 de Febreru, aniversariu de les deportaciones stalinistes de les naciones ingush y chechena, pero agora afirma que posponen toles protestes hasta dempués de les elleiciones presidenciales ruses del 2 de Marzu.
Umalt Dudayev ye’l seudónimu d’un collaborador del IWPR nel Cáucasu Norte.
Esbilla
del.icio.us
Nun hai comentarios »