Conceyu Asturianu de Solidaridá con Chechenia

AFP

Miles de refuxaos chechenos en Polonia tienen namás un sueñu: llegar a Europa Occidental, en particular a Francia, gracies a l’ampliación de la zona Schengen ensin fronteras fai un mes.

“Quiero dir a Francia. Tol mundu equí quier dir a Francia”, afirma Ruslan, un chechenu de cuarentayalgo años que nun quier revelar el so apellíu. Ruslan llegó dende Grozni, la capital de la inredenta república rusa destrozada pola guerra, fai un mes. Agora quier colar del centru de refuxaos de Debak, cercanu a la capital polaca, Varsovia, pa dir a Francia. “Nun podemos vivir equí, les condiciones de vida son mui males. Quiero dir a Francia. Nicolas Sarkozu podría facer dalgo de verdá por nós”, añade.

En Debak, la mayoría de los refuxaos chechenos comparte esi sueñu. Dende que Polonia entró na zona de llibre tránsitu de Schengen, creen que resultará más fácil convertir esti sueñu en realidá.

Na medianueche del 21 d’Avientu cayeron les fronteres ente los antiguos 15 Estaos miembros de la zona Schengen y nueve países, na so mayoría ex comunistes, faciendo que’l pasu a Occidente resultare aparentemente más fácil, teniendo namás que una tarxeta pa entrar na zona, yá que los nuevos Estaos miembros desmontaron los sos controles de fronteres esteriores.

“Muncha xente, principalmente de la rexón del Cáucasu, llegó a Polonia antes del 21 d’Avientu, cola esperanza de poder viaxar a los países más ricos d’Europa Occidental y col miéu de que Polonia cerrare la so frontera oriental”, desplica Waldemar Mikolajczyk, vicepresidente del centru de Debak. “En Setiembre y Ochobre llegaben cada día un cientu persones, mientres que a mediaos d’Avientu llegaben ente 250 y 300 persnoes al día”, afirma. Dende aquella p’acá el fluxu baxó un poco. La mayoría de los refuxaos nun tién intención de quedar en Polonia, sigún Mikolajczyk. Ente’l 21 d’Avientu y el 7 de Xineru unes 1.300 persones dexaron los centros de refuxaos en Polonia, afirma. “Un día 32 persones desapaecieron del centru de Debak durante la rueda de llamaes”. Dende’l 7 de Xineru, desapaecieron otres 479 persones. Munchos fueron deteníos nel so camín a Europa Occidental. Sigún la llexislación de la Xunión Europea, teníen que pedir asilu nel primer país seguru al que llegaren, nesti casu Polonia.

Dos díes dempués de que Polonia entrare na zona Schengen, 48 chechenos fueron deteníos a bordu d’un tren que viaxaba ente Varsovia y Viena. Otros 59, incluyíos 28 neños, fueron deteníos nun tren que diba dende la capital polaca a Berlín, aparentemente cuando diben a Francia, país que los refuxaos consideren que ye más hospitalariu yá que ye l’hogar d’una importante comunidá de peticionarios de refuxu chechenos. Dellos díes más tarde, otros 28 chechenos, incluyíos 12 neños, fueron tamién deteníos durante otru intentu illegal de cruzar la frontera.

Fai poco paecía que’l númberu de chechenos que colaba de Polonia taba decreciendo. “Tán en contactu cola xente que marcha y falla nel intentu de llegar al so destín. Dalfunos d’ellos acaben encerraos en centros de deportación” n’Europa Occidental, desplica Mikolajczyk.

Khamid, un home de más de 40 años tamién, afirma que coló de Chechenia por “razones de seguridá personal”. Chechenia foi destruyía nos últimos 13 años por dos campañes militares ruses que teníen como fin acabar col movimientu separatista. Ataques de guerrilla a pequeña escala contra les fuercies ruses y combates ente grupos chechenos prorrusos y antirrusos son tovía frecuentes na provincia. Dempués de llegar a Polonia en Setiembre, Khamid viaxó illegalmente hasta Austria a pie y en tren. Al llegar contactó cola policía austríaca y, pa desgracia suya, foi internáu nun centru de detención y deportáu de nueu a Polonia.

Dende’l so retornu tá viviendo en Debak, nuna habitación pequeña llena de lliteres. Na paré, un debexu fechu a manu d’una mezquita y un mapa políticu del mundu, nel que les fronteres de tolos países europeos tán bien marcaes. Chechenia muéstrase como parte integrante de Rusia. Cerca de la ventana, una alfombra doblada sirve como alfombra pa la oración.

Anguañu Khamid espera que Polonia-y conceda’l status de refuxáu. “Quiero quedar en Polonia porque la xente d’equí nos recibió bien y comprende la nuesa situación. Si nun lo consigo, quiero dir a Francia. Dempués de too, la xente tamién ye bien recibía allí”, afirma.

Esbilla | del.icio.us

Dexar un comentariu