Conceyu Asturianu de Solidaridá con Chechenia

Por Umalt Chadayev, Prague Watchdog

Díes atrás tuvo llugar un enfrentamientu nun de los Centros d’Acoyía Temporal (CAT) de Grozni ente Persones Desplazaes Internamente (PDIs) y y funcionarios de l’Alministración del distritu. Un miembru del Centru d’Información de la Xunión Chechena d’Organizaciones Non Gubernamentales narró a un corresponsal de Prague Watchdog que l’incidente tuvo llugar nel CAT de la cai Tchaikovsky el pasáu 23 de Xineru. Añadió que, como resultáu del enfrentamientu, dos muyeres que residen nel Centru resultaron con feríes de consideración, y qu’una d’elles tuvo que ser treslladada al Hospital por posibles lesiones medulares.

El pieslles de CATs na República de Chechenia ye un problema recurrente. Les autoridaes prometieron que dengún de les PDIs va quedar ensin un techu nel que abellugase, y que cada familia tendrá una vivienda, bien gracies a les ayudes municipales, bien apurriéndo-yos tierres nes que construyir la so propiedá. Por embargu, la realidá ye bastante diferente.

Fai unes poques selmanes, entamó’l pieslle d’un CAT asitiáu nel barriu de Chernorechye, nel distritu Zavodskoy de Grozni. Los funcionarios de l’Autoridá local y de Migración ordenaron a la xente, con pocu tiempu d’antelación, qu’abandonaren les instalaciones. Prometióse-yos a cada familia 18.000 rublos (unos 500 euros, N. del T.) pal alquiler de vivienda durante un periodu de 6 meses, asina como un certificáu garantizándo-yos preferencia a la hora de consiguir una vivienda municipal. Munches PDIs consideren esti tipu d’acciones acrecienten la decepción xeneralizada.

“Sé perfectamente’l valor que tienen estes promeses de los funcionarios”, afirma Maret, una muyer chechena de 38 años. “Fai dos años, cuando tábemos viviendo nun CAT n’Inguxetia, llegó un grupu funcionarios de distintes alministraciones p’animanos a volver a la República, dando garantíes de que toles persones que tornaren diben cobrar en poco tiempu compensaciones poles sos viviendes destruyíes durante la guerra y tou tipu d’asistencia social. Namás llegar nos metieron en CATs nos que les condiciones nun yeren meyores –si nun yeren incluso peores- que les que teníemos n’Inguxetia. Y asina fue: les autoridaes escaeciéronse de nós. Agora alcuérdense de nós otra vez porque la orden de cerrar tolos CATs vién de “mui arriba”, y hai qu’acabar col problema de les PDIs”.

“Agora tán prometiéndonos otra vez la tierra del llechi y el miel”, afirma Maret. “Cuando abandonemos los CATs volverán a escaecese de nós. Pa convencer a la xente de les sos buenes intenciones, a veces-y conceden un pisu a dos o tres families, y al restu prométen-yos que-yos darán vivienda tamién. Esto ye lo más que faen”.

“Conozo delles families que tuvieron viviendo en CATs y que-yos dieron un pisu en Grozni. Tiempu dempués apeció xente que tenía tolos papeles llegales d’esos apartamentos, y les PDIs tuvieron que marchar d’ellos de vacío. Nun quiero dicir los sos nomes, pa qu’esta xente nun tenga problemes llueu”.

“Tán intentando da-yos una nueva vivienda”, afirma un miembru d’una organización local de Derechos Humanos. “Casi too equí se fai al estilu Chernomyrdin (Chernomyrdin foi Primer Ministru de Rusia durante la presidencia de Yeltsin”. ¿Recuerdes el so famosu: “queríemos lo meyor, pero frustróse como siempre”? Pasa lo mesmo equí. Les nueses autoridaes quieren lo meyor, pero siempre se frustra, en perxuiciu de la xente que tá más marxinao”, afirma l’activista d’esta organización.

Mientres tantu, les autoridaes aseguren que’l problema de les persones desplazaes internamente en Chechenia tá resolviéndose con bastante éxitu. “Anguañu hai 12 CATs funcionando en Grozni, que dan abellugu a más de 1.000 families. L’añu anterior había 21 CATs na ciudá, y 4.4445 families nellos. En tan sólo un añu fuimos quién a reubicar a más de 3.000 families. Dalgunes d’elles recibieron acomodu del “fondu de cases abandonaes” (pisos que son tresferíos al Estáu polos sos propietarios orixinales, que normalmente abandonen Chechenia), y a otres se-yos tá dando la oportunidá d’alquilar un pisu”, aseguren dende la oficinal de l’alcaldía de Grozni.

Sigún dalgunes informaciones, hai planes pa pesllar durante esta prósima primavera los CATs que tovía queden en Grozni. Desconózse’l sitiu nel que les autoridaes tienen pensao reubicar a les families que viven nellos, mientres que tovía nun tá resueltu oficialmente’l problema de les PDIs que vivíen nos CATs.

Esbilla | del.icio.us

Dexar un comentariu