Conceyu Asturianu de Solidaridá con Chechenia

Por Liz Fuller
Fai 35 años, el 16 de Xineru de 1973, los inguxes entamaben a concentrase énte los cuarteles en Grozni del Comité del Partíu Comunista de la Xunión Soviética (PCUS) nel Oblast de Chechenia-Inguxetia pa desixir o la tresferencia de la disputada rexón de Prigorodni, na vecina Osetia del Norte, a la República Autónoma Socialista Soviética (RASS) de Chechenia-Inguxetia, o que se aboliere la prohibición a los inguxes de volver a los sus hogares.

Durante los 3 díes siguientes, decenes de miles d’inguxes llegaron a Grozni dende tola República y dende Osetia del Norte. Dalgunos chechenos sumáronse tamién a la concentración como muestra de solidaridá, otros apurríen-yos a los participantes comida y otres coses. Una semeya d’archivu muestra la plaza lliteralmente llena de xente. La concentración pacífica duró 3 díes, hasta que les fuercies de seguridá acudieron el día 19 pela tardey la dispersaron con cañones d’agua. Anque, al contrario de lo que pasó en 1962 nes protestes de los trabayadores de Novocherkassk, nadie foi asesináu, los organizadores y munchos de los participantes perdieron el so emplegu y fueron espulsaos del PCUS, un castigu qu’afectó negativamente a les sos carreres y vides durante los siguientes años.

Nuna entrevista col Serviciu Cáucasu Norte de RFE/RL, y nun artículu asoleyáu el 16 de Xineru nel web independiente ingushetia.ru, ún de los participantes, Beslan Kostoyev, repasa los fechos que precedieron a la protesta. La rexón de Prigorodni formó parte de la RASS de Chechenia-Inguxetia hasta la deportación masiva, en Febreru de 1944, de los chechenos ya inguxes a Asia Central por orden del líder soviéticu Iosiv Stalin, tres lo que s’incorporó a la vecina RASS d’Osetia del Norte. Nel 20º Congresu del PCUS, en Febreru de 1956, el Secretariu Xeneral del Comité Central del PCUS, Nikita Kurschev, exoneró a los chechenos y a los inguxes de les acusaciones llanzaes contra ellos por Stalin de collaborar col avance de les tropes nazis alemanes. Un añu dempués, chechenos ya inguxes entamaron a retornar a la so república d’orixen, pero a los inguxes nun se-yos permitió reclamar les sos antigues cases na rexón de Prigorodni.

La protesta de Xineru de 1973 en Grozni foi la culminación de meses de constante presión de les autoridaes soviétiques. Ente Marzu y Abril de 1972, 27 miembros del Partíu Comunista d’Inguxetia redactaron un escritu dirixíu al Comité Central del PCUS baxo’l títulu “Sobre les violaciones de la Política de Nacionalidaes Leninista de la Xunión Soviética nel territoriu de la RASS de Chechenia-Inguxetia”. Esta carta foi rápidamente denunciada por ser “una difamación de la realidá soviética” nel plenu del 11 d’Abril del Obkom de Chechenia-Inguxetia del PCUS, y na asamblea del 24 d’Agostu del Comité local del Partíu en Nazrán fizo pública una condena asemeyada de los innombrables “nacionalistes que desaxeren artificialmente’l problema de la rexón de Prigorodni”.

En Payares de 1972, un gurpu d’intelectuales inguxes redactó una carta de 80 páxines titulada “Sobre’l destín del Pueblu Ingush”, dirixía al sucesor de de Kruschev, Leonid Brezhenv. Cinco de los autores viaxaron a Moscú, onde-y entregaron personalmente esta carta’l día 2 d’Avientu al funcionariu del Comité Central Yevgeny Razumov, que calificó la carta como fuera de la política del Partíu y que nun reflexaba los intereses de la totalidá del Pueblu ingush. Sigún Kostoyev, los autoren recibieron menacies de perder el so emplegu y d’espulsión del Komsomol o el PCUS.

Chando la vista atrás, Kostoyev recuerda que la concentración de protesta de Xineru de 1973 “nun fue sólo esclusivamente democrática”, sinon que tamién foi disciplinada, organizada y políticamente moderada. Refuga categóricamente l’acusación de “nacionalismu”. Otru escritor, Ismail Bokov, recuerda que los participantes llevaben retratos de Lenin y otros prominentes comunistes, y pancartes que nun sólo decíen “Dexái triunfar a la xusticia”, sinon que tamién, col clásicu estilu de propaganda soviéticu, pedíen coses como, “¡Gloria a la Roxa Inguxetia, vanguardia del poder soviéticu nel Cáucasu Norte!”.

Pesie a la naturaleza pacífica y pro-soviética de la concentración, movilizóse a les tropes pa dispersar a los participantes, pero, curiosamente, abstuviéronse de facer arrestos. La fola de represalies, arrestos y despíos entamó unos díes dempués, ya incluyó nun sólo a los cinco autores de la carta de Payares a Brezhnev, que fueron misteriosamente identificaos como los organizadores de la concentración, sinon a centenares de “activistes del movimientu nacionalista”, ente los que taba Kostoyev. El 21 de Xineru, el miembru del Politburó Mikhail Solomentsev voló a Moscú, onde acusó a los participantes na concentración de “nacionalistes” y alvirtió de que “los inguxes nun taben rehabilitaos, taben perdonaos”, insinuando asina que les razones pa la deportación de 1944 nun yeren infundaes.

En Marzu de 1973, el Comité Central del PCUS adoptó una resolución llamada “Sobre les Manifestaciones Nacionalistes Anti-Sociales en Grozni”. Les asamblees del Partíu de a niveles más baxos tamién ficieron condergues asemeyaes a la de Xineru y castigaron a los sos participantes. El Presidente de Soviet Supremu de la RASS de Chechenia-Inguxetia, Kureish Ozdoyev, foi cesáu n’Agostu de 1973, y el Primer Secretariu del Partíu na República, Semen Apryatkin, consiguió mantenese nel so puestu durante dos años más.

Pero los inguxes nun abandonarones les sos reivindicaciones sobre la rexón de Prigorodni nin la so esperanza en que un día se reintegrare na so República. N’Abril de 1991, el Soviet Supremu de la URSS animó estes esperances al aprebar una llei “Sobre la rehabilitación de los pueblos reprimíos” qu’aseguraba que la rexón de Prigorodni había ser devuelta a la RASS de Chechenia-Inguxetia, pero nun especificaba cómo nin cuándo debía facese. La RASS de Chechenia-Inguxetia dixebróse en dos Repúbliques, Chechenia ya Inguxetia, en Xunetu de 1992, pero les fronteres d’estos dos territorios nun se formalizaron.

Les conflictives reclamaciones d’osetios ya inguxes sobre la rexón de Prigorodni llevaron a una curtia pero brutal guerra ente Ochobre y Payares de 1992, na que morrieron más de 500 persones, y tres la que ente 34.000 y 64.000 inguxes que volvieron non oficialmente a la rexón de Prigorodni fueron forciaos a dexar de reclamar les sos cases y colar. Dende finales de 1992, les autoridaes oseties vienen resistiéndose a cumplir los sucesivos planes ellaboraos en Moscú pa permitir a los inguxes a volver a la rexón de Prigorodni. Al mesmu tiempu, les conflictives reivindicaciones sobre esti territoriu dominen y envelenen les relaciones ente los dos Pueblos, que siguen presionando ensin descansu a Moscú ca ún pel so lláu pa que se posicione al so favor.

Esbilla | del.icio.us

Dexar un comentariu