INTERRUMPIDA LA EDUCACIÓN EN CHECHENIA
Por Umalt Chadayev (Prague Watchdog)
El presente iviernu tá siendo, probablemente, ún de los más fríos de los últimos años en Chechenia. En delles escueles interrumpiéronse casi la mitá de les clases por culpa del fríu iviernu.
“Pa describir lo que tá pasando anguañu nes nueses escueles, sólo puedo usar una pallabra: desastre” afirma Seda Karimova, una vecina de Grozni de 44 años, al corresponsal de Prague Watchdog. “Nun hai casi clases en marcha en denguna escuela. En Setiembre, les clases na Escuela de Secundariia nb. 44 (nel distritu Staropromyslovsky de Grozni), a la que va la mi fía, entamaron dos selmanes tarde. Más tarde, por mor de les elleiciones a la Duma Estatal n’Avientu, canceláronse les clases durante casi’l mesmu períodu de tiempu”.
“Denguna clas llega a los 20 minutos, porque les aules son terriblemente fríes, y los neños, cenciellamente, nun aguanten más tiempu siguío dientru d’elles. ¿Qué tipu d’educación normal puede haber nestes condiciones tan dures? Los nuesos neños, realmente, nun tán recibiendo casi clas”, asegura furiosamente esta muyer. “¿Por qué’l Ministeriu d’Educación nun tá faciendo nada? ¿Por qué nun se-y piden responsabilidaes a naide”.
Durante dellos años, les escueles de la República calentáronse con pequeñes estufes de gas y fogones porque los sistemes de calefaición central quedaron en mal estáu como resultáu de l’actividá militar. En 2006 Ramzan Kadyrov desixó que se retiraren les estufes de gas de les instalaciones escolares, y que se instalaren unos sistemes de calefaición central afayaízos. Seda afirma que antes de que entamare’l cursu académicu anuncióse que taben llevándose a cabu reparaciones en toles escueles de la República, y que tolos problemes rellacionaos cola calefaición taben resueltos dafechu. Por embargu, cree que en munches escueles esto nun ye asina. “A cada director, a cada trabayador del sector con responsabilidaes nestos temes habría que pregunta-yos por qué persiste’l problema”, afirma la muyer.
Sigún el director d’una escuela en Grozni, que nun quier desvelar la so identidá, los problemes de calefaición en delles escueles son por culpa de la so xestión, “na mi escuela, por exemplu, too furrula bien”, afirma. “Nun hai interrupciones nes clases, y nun tenemos que cancelar nin acortar la duración de les clases (de 45 a 20 minutos, como n’otres escueles). Débese too al fechu de que gastemos les perres que mos apurrieron pa reparar les sistema de calefaición no que debíemos. Pero otros, p’aforrar perres, o incluso por otres razones nes que nun quiero entrar, nun lo ficieron. Y el resultáu ye, como diz el dichu, fácil de ver”.
Munchos mayestros chechenos afirmen que’l nivel académicu de los escolinos chechenos ye sinificativamente más baxu que la media. Esto débese, principalmente, al fechu de que nos últimos 15 años hubo dos campañes militares na República.
“Los nuesos neños, pesie a too, tán impacientes por deprender. Por eso nencesiten ver cumplíes unes condiciones básiques, que tendríen que ser resueltes poles persones ya instituciones correspondientes. Pa eso se-yos paga a eses persones, pero ocupen los sus cargos y nun faen el trabayu que se supón que deberíen. Tán más interesaos nos beneficios que pueden sacar de los sus trabayos, y sólo se preocupen del su propiu bientar”, conclúi Seda.
Esbilla
del.icio.us
Nun hai comentarios »