EL FSB DECRETA UNA OPERACIÓN ANTI-TERRORISTA NEL ÁREA DE SUNZHENSK N’INGUXETIA Y NEL DISTRITU D’ACHKHOY-MARTAN EN CHECHENIA 26-11-2009 GTM 1 @ 13:51
borz —Axisglobe
Na mañana del pasáu martes 24 entró en vigor una operación anti-terrorista nel área de Sunzhensk, allugada na república norcaucásica d’Inguxetia, sigún informó l’axencia de noticies RIA Novosti citando un comunicáu del serviciu de prensa del Serviciu Federal de Seguridá (FSB) de la Federación Rusa n’Inguxetia.
Un voceru de la Direición del FSB afirmó a l’axencia de que teníen información de que miembros de grupos armaos illegales, envueltos na comisión de crímenes especialmente graves, podríen tar escondíos nel área especificáu.
Esbilla
del.icio.usCHECHENIA NUN DISPÓN DE LES CONDICIONES AFAYAÍCES PA LA REHABILITACIÓN DE NEÑOS MINUSVÁLIDOS 25-11-2009 GTM 1 @ 12:50
borz —Muslim Ibragimov, pa Caucasian Knot
Los neños minusválidos d’esta república nun tienen oportunidá de recibir un tratamiento afayaízu, yá qu’esiste un sólu centru de rehabilitación pa los alredor de 40.000 neños que tán nesa situación.
Sigún el Ministeriu de Trabayu, Inserción Llaboral y Asuntos Sociales de Chechenia, anguañu la república tién 41.189 neños minusválidos. Amás 1.300 güérfanos de padre y madre y 25.000 d’un de los dos viven nel país.
NACIONES XUNÍES CONFIRMA QUE LA ESTRADICIÓN DE CHECHENOS-YOS PUEDE ACARREAR RIESGOS A ÉSTOS 24-11-2009 GTM 1 @ 14:11
borz —www.waynakh.com
La 43ª sesión del Comité de les Naciones Xuníes (NX) contra la tortura tuvo llugar en Xinebra ente los díes 2 y 20 d’esti mes de Payares. Como resultáu de la sesión, el Comité de les Naciones Xuníes contra la tortura confirma que la deportación de refuxaos chechenos puede suponé-yos a éstos un riesgu real de sufrir tortures.
Nesta 43ª sesión del Comité de les Naciones Xuníes contra la tortura, ésti debatió’l tercer informe periódicu de la República d’Azerbayán sobre la Convención contra la tortura y otros castigos o tratamientos crueles, inhumanos o degradantes. La representación d’Azerbaiyán formáronla 13 funcionarios del Estáu, y taba encabezada por Khalaf Khalafov, Viceministru d’Esteriores.
CIUDADANOS D’ETNIA RUSA ABANDONEN EL CÁUCASU NORTE 20-11-2009 GTM 1 @ 15:21
borz —Valeri Dzutsev
El pasáu 3 de Payares, el presidente de Daguestán, Mukhu Alíev, convocó un conceyu especial pa tratar los problemes de los ciudadanos d’etnia rusa residentes na República. Pesie al tonu optimista qu’exhibíen los funcionarios, paez ser que los rusos siguen colando de Daguestán, anque les cifres nun son tan elevaes como lo fueron xusto dempués del colapsu de la Xunión Soviética en 1991.
Sigún el presidente Alíev, en 1959 los rusos representaben el 20% de la población daguestaní y yéren el segundu grupu étnicu más importante d’esta multiétnica república. Por embargu, en 1989, la población d’etnia rusa quedó amenorgada al 9% de la población total de la República, y los años que siguieron, a menos del 5%. Güei, los ciudadanos d’etnia rusa ocupen la sesta posición nel rangu de les numberoses etnies esistentes al Daguestán: ávaros, darguinos, kumikos, lesguinos o laks superen en númberu a los rusos. Nel periodu comprendíu ente los dos censos rusos (1989 y 2002), la población rusa en Daguestan perdió un 27%. Viven nel Daguestán menos de 120.000 persones ruses, sigún les cifres oficiales.
ATAQUE A UNA FAMILIA DE REFUXAOS CHECHENOS N’AZERBAYÁN 17-11-2009 GTM 1 @ 10:48
borz —www.waynakh.com
Sigún fontes d’Ichkeria.info, dellos homes armaos y encaperuzaos inrumpieron nel apartamentu del refuxáu chechenu Arbi B. y menaciaron a la su familia, durante la nuechi del 11 Payares, en Bakú capital d’Azerbayán.
Cuando Arbi vio a los homes armaos, saltó pela ventana de la su casa, nun segundu pisu, y entamó la fuxida de la persecución. Los encaperuzaos golpearon a la su esposa y afirmaron que, si nun topaben a Arbi cuando volvieren la prósima vez, diben matala a ella y a los 3 fíos.
EL TRIBUNAL D’ESTRASBURGU CONDERGA A RUSIA CON 130.000 EUROS POLA DESAPAICIÓN DE TRES CHECHENOS 30-10-2009 GTM 1 @ 11:40
borz —El Tribunal d’Estrasburgu acaba condergar a Rusia a pagar 130.000 euros pola desapaición nel añu 2000 de tres persones na República de Chechenia, sigún afirma un comunicáu de prensa asoleyáu esti xueves.
Los 3 casos referíense a denuncies de los demandantes de que los sus familiares allegaos desapaecieron en Chechenia dempués de ser deteníos por soldaos rusos, informó’l Tribunal Européu de Drechos Humanos.
CONTINÚEN LES TORTURES Y SECUESTROS EN CHECHENIA 26-10-2009 GTM 1 @ 22:42
borz —www.waynakh.com
Cuatro ciudadanos de la República Chechena d’Ichkeria fueron secuestraos y torturaos por miembros del grupu local del FSB en Chechenia.
Sigún fontes d’Ichkeria.info, el pasáu 21 d’Ochobre miembros del FSB ficieron una redada na localidá de Benoy, nel distritu chechenu de Nozhai Yurt. A primer hora de la mañana, Timur Khadzhimuradov (de 23 años) y Askhab Lepiev (de 21 años) fueron secuestraos nes sus cases por miembros del FSB.
CONDERGUEN A RUSIA A INDEMNIZAR A UNA FAMILIA CHECHENA 25-07-2009 GTM 1 @ 20:59
borz —RIA NOVOSTI
El Tribunal Européu de Drechos Humanos condergó’l pasáu xueves a Rusia a indemizar con 37.000 euros a los familiares d’un chechenu que foi secuestráu en 2001.
La familia de Khizir Tepsurkayev, secuestráu n’Urus Martan en 2001, denunció los fechos delles vegaes énte los tribunales rusos antes de poner una denuncia nel Tribunal d’Estrasburgu acusando a Rusia de nun llevar a cabu una investigación efectiva p’atopar a los culpables.
Chechenia o el silenciu nel imperio del terror 23-07-2009 GTM 1 @ 21:20
borz —Grozni trae a la mente destrucción y masacres pero anguañu ye quiciabis una de les ciudaes más guapes de la Federación Rusa, con munches obres en marcha y soleaes aveníes con bellos edificios. Los pocos que s’animen a falar con un periodista estranxeru refuercen esta imaxen oficial. Nin la más mínima crítica, hasta que ún allónxase de la cai y s’alcuentra cola Chechenia real.
Urtzi URRUTIKOETXEA, GARA
Nun ye fácil intentar perpasar el llímite d’una población aterrorizada que nun gana nada y tién muncho que perder falando con periodistes estranxeros. Na sede de Memorial preséntase un home al que l’enfadu impidi-y callar. Son los propios miembros d’esta organización de drechos humanos los que-y alvierten de les consecuencies y dirixen la conversación pola senda’l anonimatu. Diremos que l’home, d’unos cincuenta años, llegó del pueblu de Shali, onde acaba tener llugar una zachistka (operación especial). L’home nun se quexa de que los kadirovtsi, los homes armaos del presidente, entregáran-yos el cuerpu torturáu del su sobrín, supuestamente miembru de la guerrilla. Asume la retórica del gobiernu, repetía durante estos díes por Ramzan Kadirov: «Nun vamos garrar prisioneros, vamos destruilos. Mientres esistan, habrá sangre». La quexa de Zurab (nome ficticiu) ye que dempués d’entregar el calabre del supuestu militante los kadirovtsi dieron-y una paliza al su pá: «¿Qué culpa tinía’l mio hermanu?».
MEMORIAL SUSPENDE LA SU ACTIVIDÁ EN CHECHENIA 19-07-2009 GTM 1 @ 22:45
borz —Caucasian Knot
La organización en defensa de los drechos humanos Memoria va suspender la su actividá en Chechenia tres el secuestru y asesinatu de la su miembro Natalia Estemoriva.
Sigún afirmó güei Alexander Cherkasov, miembru del Comité Executivu de Memorial, “sabiendo que lo que facemos puede suponer un peligru mortal pa la nuesa xente, nun podemos correr esi riesgu”. Cherkasov nun especificó cuántu tiempu va prolongase esta suspensión, pero afirmó que la decisión tá rellacionada, ente otres coses, cola consternación pola muerte de Natalia Estemirova, miembru de Memorial, sigún informa l’Axencia Interfax.
